لاہور ہائیکورٹ نے ایل پی جی (LPG) مارکیٹنگ کمپنیوں کی جانب سے غیر قانونی طور پر اضافی پریمیم کی وصولی کے خلاف حکمِ امتناعی جاری کرتے ہوئے اس عمل کو فوری طور پر معطل کر دیا ہے۔

جسٹس مرزا وقاص رؤف نے لاہور ہائیکورٹ بار کے وکیل اور صدر لاہور ہائیکورٹ بار بابر مرتضیٰ خان کی آئینی درخواست پر سماعت کے دوران یہ فیصلہ سنایا۔ درخواست گزار نے عدالت کو آگاہ کیا کہ 40 سے زائد ایل پی جی پیدا کرنے والی اور مارکیٹنگ کمپنیاں غیر قانونی طور پر اضافی پریمیم کے نام پر اضافی رقم وصول کر رہی ہیں، جس کا براہِ راست اضافی مالی بوجھ غریب اور عام صارفین پر پڑتا ہے اور وہ مہنگی گیس خریدنے پر مجبور ہوتے ہیں۔

سماعت کے دوران عدالت نے شدید برہمی اور تشویش کا اظہار کرتے ہوئے ریمارکس دیے کہ گیس عام آدمی کے استعمال کی بنیادی ضرورت ہے، اسے کمپنیوں کے رحم و کرم پر نہیں چھوڑا جا سکتا اور شہریوں کے مفادات کا تحفظ ہر صورت یقینی بنایا جائے گا۔ عدالت نے آئل اینڈ گیس ریگولیٹری اتھارٹی (OGRA) اور تمام لائسنس ہولڈر ایل پی جی کمپنیوں کو نوٹس جاری کرتے ہوئے تفصیلی جواب طلب کر لیا ہے اور آئندہ سماعت تک اضافی پریمیم کی وصولی پر پابندی کا حکم برقرار رکھا ہے۔