تھائی لینڈ میں سکول میں فائرنگ سے 7 افراد ہلاک، 15 زخمی

تھائی لینڈ کے دارالحکومت بنکاک میں ایک اسکول کے اندر فائرنگ کا ہولناک واقعہ پیش آیا ہے، جس کے نتیجے میں ایک ٹیچر اور متعدد طلبہ سمیت 07 افراد ہلاک جبکہ 15 شدید زخمی ہو گئے ہیں۔

غیر ملکی میڈیا اور مقامی حکام کے مطابق فائرنگ کرنے والا ملزم اسی اسکول کا طالب علم تھا، جو صبح کے وقت اسکول کی عمارت میں چھپا ہوا تھا۔ اندھا دھند فائرنگ کے بعد ملزم نے خود کو گولی مار کر اپنی زندگی کا خاتمہ کر لیا۔ واقعہ کی اطلاع ملتے ہی پولیس، طبی عملے اور قانون نافذ کرنے والے اداروں نے موقع پر پہنچ کر زخمیوں کو فوری طور پر قریبی ہسپتالوں میں منتقل کیا اور علاقے کو گھیرے میں لے کر تحقیقات کا آغاز کر دیا۔

واضح رہے کہ رواں سال فروری میں بھی جنوبی تھائی لینڈ کے ضلع ہاٹ یائی کے ایک اسکول پر مسلح شخص کے حملے کے نتیجے میں 01 استاد ہلاک اور 01 طالب علم زخمی ہوا تھا، جس کے بعد حالیہ واقعے نے ملک بھر میں اسکولوں کی سیکیورٹی پر گہرے سوالات اٹھا دیے ہیں۔ حکام کی جانب سے حملہ آور طالب علم کے محرکات جاننے کے لیے تفتیش جاری ہے، تاہم تاحال کوئی باضابطہ بیان جاری نہیں کیا گیا۔