وزیراعظم نے اپوزیشن لیڈر کے خط کا جواب بھجوا دیا، آئین پر عملدرآمد کی یقین دہانی

وزیرِ اعظم شہباز شریف نے قومی اسمبلی میں اپوزیشن لیڈر محمود خان اچکزئی کے مراسلے کا باضابطہ جواب ارسال کر دیا ہے، جس میں انہوں نے چیف الیکشن کمشنر اور الیکشن کمیشن آف پاکستان کے نئے اراکین کی اہم تقرریوں میں آئینِ پاکستان کی مکمل پاسداری کی یقین دہانی کروائی ہے۔ باوثوق ذرائع کے مطابق وزیرِ اعظم کی جانب سے بھیجا گیا مکتوب اپوزیشن لیڈر کو موصول ہو چکا ہے، جس میں الیکشن کمیشن کی آئینی اسامیوں کو پر کرنے کے لیے تمام مقررہ قانونی و آئینی مراحل اور طریقہ کار کو شفاف انداز میں طے کرنے کا اعادہ کیا گیا ہے۔

دوسری جانب، خط موصول ہونے کے بعد اپوزیشن لیڈر محمود خان اچکزئی اور سینیٹ میں اپوزیشن لیڈر راجہ ناصر عباس کے درمیان ایک اہم ملاقات ہوئی، جس میں محمود خان اچکزئی نے وزیرِ اعظم کے خط اور اس کے مندرجات سے راجہ ناصر عباس کو تفصیلی طور پر آگاہ کیا۔ اس ملاقات میں الیکشن کمیشن کے نئے اراکین کی نامزدگیوں سے متعلق آئندہ کی متفقہ حکمتِ عملی وضع کرنے کے لیے تمام اتحاد میں شامل اپوزیشن رہنماؤں اور پارلیمانی اراکین کو بھی اعتماد میں لینے پر اتفاق کیا گیا۔