وزیر اعظم کی اشیاء خورونوش کی خلیجی ممالک کو برآمد کیلئے فوری اقدامات کی ہدایت

اسلام آباد: وزیراعظم محمد شہباز شریف کی زیرِ صدارت وزیراعظم ہاؤس میں منعقدہ ایک اہم جائزہ اجلاس میں خلیجی ریاستوں کو اشیائے خورونوش کی بلاتعطل فراہمی اور پاکستانی بندرگاہوں کی استعداد کار بڑھانے کے لیے تزویراتی اقدامات کا فیصلہ کیا گیا ہے۔ وزیراعظم نے واضح کیا کہ عالمی سپلائی چین کے مسائل اور علاقائی صورتحال کے تناظر میں خلیجی ممالک کی غذائی ضروریات کا خیال رکھنا پاکستان کا فرض ہے۔

اجلاس میں بریفنگ دی گئی کہ ایک خصوصی کمیٹی نے خلیجی ممالک کو برآمد کے لیے 40 بنیادی اشیاء کی منظوری دی ہے، جن میں چاول، چینی، گوشت، پولٹری، ڈیری مصنوعات، پھل اور سبزیاں شامل ہیں۔ وزیراعظم نے ہدایت کی کہ ملکی ضروریات کو متاثر کیے بغیر ان اشیاء کی برآمدات کو تیز کیا جائے اور اس عمل میں کسی بھی قسم کی بیوروکریٹک تاخیر برداشت نہیں کی جائے گی۔

تجارت کو سہل بنانے کے لیے حکومت نے کراچی اور بن قاسم کی بندرگاہوں پر نقل و حمل کے نرخوں میں 60 فیصد تک کمی کر دی ہے، جبکہ ٹرانس شپمنٹ کی صلاحیت بڑھانے کے لیے کسٹمز قوانین میں ضروری ترامیم بھی کر دی گئی ہیں۔ وزیراعظم نے کراچی، گوادر اور دیگر بین الاقوامی ہوائی اڈوں پر فلائٹ آپریشنز میں اضافے کے لیے جامع لائحہ عمل تیار کرنے کی بھی ہدایت جاری کی ہے۔