سعودی عرب کے ساتھ کھڑے ہیں، وزیراعظم شہبازشریف کی سعودی ولی عہدکویقین دہانی، سعودیہ میں ایرانی حملے کی مذمت

وزیراعظم شہباز شریف نے سعودی ولی عہد محمد بن سلمان کو یقین دہانی کرائی ہے کہ پاکستانی حکومت اور عوام ہمیشہ اپنےسعودی بھائیوں اور بہنوں کےساتھ شانہ بشانہ کھڑے رہیں گے۔

وزیرِ اعظم اور سعودی عرب کے ولی عہد کے درمیان ٹیلیفونک رابطہ ہوا جس میں خطے میں جاری کشیدگی پر تبادلہ خیال کیا۔

اعلامیے کے مطابق وزیرِ اعظم نے حملوں کے تناظر میں سعودی عرب کے ساتھ پاکستان کی جانب سے مکمل یکجہتی کا اظہاراور مکمل حمایت کا اعادہ کیا۔

وزیراعظم شہباز شریف نےسعودی عرب میں الجبیل آئل فیسیلیٹی پر حملے کی شدید مذمت کی اور کہا کہ پاکستانی حکومت اور عوام ہمیشہ اپنے سعودی بھائیوں اور بہنوں کےساتھ شانہ بشانہ کھڑے رہیں گے، سعودی عرب کے ساتھ ایسےکھڑے رہیں گے جیسے سعودی قیادت اور عوام نے ہر مشکل وقت میں پاکستان کا ساتھ دیا۔

وزیرِ اعظم نے موجودہ کشیدگی کےدوران سعودی قیادت کی جانب سے تحمل اور دانشمندی کے مظاہرے کو سراہا۔

شہباز شریف کا کہنا تھاکہ  پاکستان دیگر ممالک کے ساتھ مل کر امن کی کوششوں کو کامیاب بنانےکےلیے بھرپور کردار ادا کررہا ہے۔

انہوں نےکشیدگی کم کرنےکےلیے پاکستان کی سفارتی کاوشوں سے بھی سعودی ولی عہد کو آگاہ کیا جبکہ سعودی ولی عہد نےخطےمیں امن واستحکام کی بحالی کےلیےپاکستان کی کوششوں کو سراہا۔