صحت کے شعبے میں اے آئی ٹیکنالوجی متعارف کرانے کا فیصلہ

وفاقی حکومت نے وزیراعظم صحت کارڈ پروگرام کے تحت کینسر، دماغی امراض اور دیگر پیچیدہ بیماریوں کی تیز رفتار اور درست تشخیص کے لیے مصنوعی ذہانت (AI) سے استفادہ کرنے کا اصولی فیصلہ کر لیا ہے۔ ذرائع کے مطابق، اس جدید انقلابی منصوبے کے نفاذ سے ملک کے تقریباً 20 کروڑ شہریوں کو فائدہ پہنچے گا، جبکہ تشخیصی اخراجات کی مد میں سالانہ اربوں روپے کی بچت متوقع ہے۔ منصوبے کے تحت اسلام آباد، پنجاب، خیبرپختونخوا، بلوچستان، گلگت بلتستان اور آزاد کشمیر کے 1100 سے زائد سرکاری و نجی ہسپتالوں میں اے آئی سسٹم نافذ کیا جائے گا۔ اس سلسلے میں وزیراعظم نے علی بابا گروپ کے سربراہ کو پاکستان آنے کی باضابطہ دعوت دے دی ہے، اور اگلے ماہ دونوں فریقین کے درمیان باقاعدہ معاہدہ متوقع ہے۔ واضح رہے کہ صحت کارڈ پروگرام پر اس وقت وفاق سالانہ 10 ارب، پنجاب 60 ارب، بلوچستان 10 ارب جبکہ خیبرپختونخوا کا صحت سہولت پروگرام 40 ارب روپے سے زائد کے سالانہ اخراجات برداشت کر رہا ہے۔