جسمانی فٹنس میں کمی 35 سال کی عمر کے بعد شروع ہوتی ہے، تحقیق

عمر کے ساتھ جسمانی فٹنس میں بتدریج کمی آنا فطری عمل ہے، مگر یہ سوال کہ یہ عمل کب شروع ہوتا ہے، اب تک غیر واضح تھا۔ سویڈن کے کیرولینیسکا انسٹیٹیوٹ کی ایک تحقیق میں اب یہ بات سامنے آئی ہے کہ 35 سال کی عمر کے بعد جسمانی فٹنس اور مضبوطی میں کمی آنا شروع ہو جاتی ہے۔

اس تحقیق میں چند سو افراد کو بلوغت کے آغاز سے لے کر 63 سال کی عمر تک مانیٹر کیا گیا اور ان کی جسمانی فٹنس، مضبوطی اور مسلز کے حجم کا جائزہ لیا گیا۔ تحقیق کے دوران ان افراد کی جسمانی حالت کو 5 دہائیوں تک یکساں انداز میں ٹریک کیا گیا، جو ماضی کی تحقیقات سے مختلف تھا، جہاں مختلف ڈیٹا بیسز کا تجزیہ کیا جاتا تھا لیکن کسی ایک فرد کا طویل عرصے تک مشاہدہ نہیں کیا گیا تھا۔

تحقیق کے مطابق 35 سال کے بعد جسمانی مضبوطی اور کارکردگی میں کمی آنا شروع ہو جاتی ہے، چاہے کوئی جوانی میں کتنی بھی ورزش کیوں نہ کرتا ہو۔ یہ تنزلی بتدریج بڑھتی ہے، مگر اگر کوئی فرد کسی بھی عمر میں ورزش کرنا شروع کرے تو اس عمل کی رفتار سست ہو جاتی ہے۔

محققین کا کہنا ہے کہ جسمانی سرگرمیاں فٹنس کی کمی کے عمل کو سست کرنے میں مددگار ثابت ہوتی ہیں۔ مکمل روکنا مشکل ہے، لیکن رفتار کو کم کیا جا سکتا ہے۔ اب اس تحقیق میں شامل افراد کی صحت کا مزید 5 سال تک جائزہ لیا جائے گا تاکہ جسمانی کارکردگی میں آنے والی تبدیلیوں کو بہتر طور پر سمجھا جا سکے۔