عالمی مارکیٹ میں پام آئل مہنگا، مقامی گھی اور تیل کے نرخ بڑھنے کا خدشہ

عالمی مارکیٹ میں خام پام آئل کی قیمتوں میں تیزی دیکھنے میں آ رہی ہے، جس کے اثرات مقامی مارکیٹ پر بھی پڑ سکتے ہیں۔ مارکیٹ ذرائع کے مطابق گزشتہ دس دنوں میں پام آئل کے نرخ میں 75 ڈالر فی ٹن اضافہ ہوا ہے اور اب یہ 1,100 ڈالر فی ٹن تک پہنچ گئے ہیں، جبکہ 26 فروری کو پام آئل کا نرخ 1,025 ڈالر فی ٹن تھا۔ فیوچر ٹریڈنگ میں بھی مسلسل تیزی کا رحجان جاری ہے۔

ماہرین کا کہنا ہے کہ اس اضافے کے باعث مقامی سطح پر خوردنی گھی اور تیل کے نرخ 20 سے 30 روپے فی کلو تک بڑھنے کا خدشہ ہے۔ پاکستان اپنی پام آئل کی تقریباً 70 سے 80 فیصد ضرورت درآمد پر پورا کرتا ہے، اس لیے عالمی منڈی میں قیمتوں میں اضافہ براہِ راست مقامی صارفین پر اثر ڈال سکتا ہے۔