آئی سی سی ٹی 20 ورلڈکپ: پاکستانی ٹیم کی تیاریوں کا آغاز کل سے، کولمبو میں وارم اپ میچ

آئی سی سی ٹی 20 ورلڈکپ کے لیے پاکستانی ٹیم کی تیاریوں کا آغاز کل سے ہوگا۔ قومی ٹیم کولمبو میں آئرلینڈ کے خلاف وارم اپ میچ کھیلے گی، جبکہ کھلاڑی آج آرام کریں گے۔ گرین شرٹس گزشتہ روز سری لنکا کے دارالحکومت پہنچے تھے۔

آئی سی سی ٹی 20 ورلڈکپ 7 فروری سے 8 مارچ تک بھارت اور سری لنکا میں کھیلا جائے گا۔ پاکستان گروپ اے میں ہے، جس میں بھارت، نمیبیا، نیدرلینڈز اور امریکا شامل ہیں۔

پاکستان ٹیم ٹی ٹوئنٹی ورلڈکپ میں اپنی مہم کا آغاز 7 فروری کو نیدرلینڈز کے خلاف کرے گی، جب کہ دوسرا میچ 10 فروری کو امریکا کے خلاف شیڈول ہے۔ ابتدائی طور پر 15 فروری کو بھارت کے خلاف میچ شیڈول تھا، تاہم حکومتی اعلان کے بعد پاکستان ٹیم یہ میچ نہیں کھیلے گی۔

گروپ اے میں پاکستان کا آخری میچ 18 فروری کو نمیبیا کے خلاف شیڈول ہے۔ اس طرح گرین شرٹس کی نظر ورلڈکپ میں بہترین کارکردگی پر مرکوز ہوگی۔