پاکستان سٹاک ایکسچینج میں زبردست تیزی کے بعد ٹریڈنگ معطل

کاروباری ہفتے کے دوسرے روز پاکستان اسٹاک ایکسچینج میں ٹریڈنگ کے آغاز پر زبردست تیزی دیکھنے میں آئی۔

ٹریڈنگ کے دوران کے ایس ای 100 انڈیکس میں 9 ہزار 300 پوائنٹس کا نمایاں اضافہ ہوا جس کے بعد انڈیکس ایک لاکھ 56 ہزار 200 پوائنٹس کی سطح تک پہنچ گیا۔ تاہم جب انڈیکس ایک لاکھ 55 ہزار 783 پوائنٹس کی حد تک پہنچا تو اسٹاک مارکیٹ میں ٹریڈنگ عارضی طور پر روک دی گئی اور کاروبار کو ایک گھنٹے کے لیے معطل کر دیا گیا۔یاد رہے کہ گزشتہ روز کاروبار کے اختتام پر پاکستان اسٹاک ایکسچینج میں شدید مندی دیکھی گئی تھی اور کے ایس ای 100 انڈیکس 11 ہزار 15 پوائنٹس کی کمی کے بعد ایک لاکھ 46 ہزار 480 پوائنٹس پر بند ہوا تھا۔دوسری جانب عالمی مالیاتی منڈیاں بھی دباؤ کا شکار ہیں۔ امریکا کی ڈوجونز مارکیٹ میں تقریباً 1000 پوائنٹس کی کمی ریکارڈ کی گئی جبکہ جاپان اور جنوبی کوریا کی اسٹاک مارکیٹس تقریباً 7 فیصد تک نیچے گر گئیں۔اسی طرح بھارت کی نفٹی مارکیٹ میں بھی تقریباً 3 فیصد گراوٹ دیکھی جا رہی ہے۔