سٹاک مارکیٹ میں مندی کا رجحان برقرار، انڈیکس ایک لاکھ 66 ہزار پوائنٹس کی حد بھی کھو بیٹھا

پاکستان اسٹاک مارکیٹ میں کاروباری ہفتے کے تیسرے روز بھی مندی کا غلبہ رہا، جس کے نتیجے میں ہنڈرڈ انڈیکس ایک لاکھ 66 ہزار پوائنٹس کی اہم نفسیاتی حد برقرار نہ رکھ سکا۔ اگرچہ کاروبار کا آغاز مثبت ہوا اور انڈیکس ایک لاکھ 69 ہزار 686 پوائنٹس کی بلند سطح تک پہنچ گیا تھا، تاہم اچانک شروع ہونے والی فروخت کے دباؤ نے تیزی کو مندی میں بدل دیا۔ کاروباری دن کے اختتام پر انڈیکس 2,588 پوائنٹس کی بڑی کمی کے ساتھ ایک لاکھ 65 ہزار 823 پوائنٹس کی سطح پر بند ہوا۔ دوسری جانب ایشیائی مارکیٹس میں ملا جلا رجحان رہا، جہاں ہانگ کانگ اور چین کے انڈیکس میں بہتری دیکھی گئی، وہیں جاپان اور انڈونیشیا کی مارکیٹس مندی کا شکار رہیں۔