پاکستان سٹاک ایکسچینج میں کاروبار کے آغاز پر مثبت رجحان

وفاقی بجٹ کی حتمی منظوری کے اہم ترین روز پاکستان اسٹاک ایکسچینج (PSX) میں زبردست تیزی کا رجحان دیکھا جا رہا ہے، جہاں ہنڈرڈ انڈیکس ایک بار پھر ایک لاکھ 79 ہزار پوائنٹس کی نفسیاتی حد عبور کرتے ہوئے بحال ہو گیا ہے۔ کاروباری ہفتے کے دوسرے روز (منگل) مارکیٹ کے آغاز سے ہی سرمایہ کاروں کی جانب سے مثبت ردِعمل دیکھنے میں آیا اور خریداری کے رجحان کے باعث انڈیکس بلندی کی طرف گامزن رہا۔

کاروبار کے آغاز پر ہنڈرڈ انڈیکس میں 934 پوائنٹس کا نمایاں اضافہ ریکارڈ کیا گیا، جس کے ساتھ ہی انڈیکس 1 لاکھ 79 ہزار 405 پوائنٹس کی بلند سطح پر پہنچ گیا۔ واضح رہے کہ گزشتہ کاروباری دن (پیر) کے اختتام پر مارکیٹ میں مندی دیکھی گئی تھی، جہاں انڈیکس 450 پوائنٹس کی کمی کے ساتھ 1 لاکھ 78 ہزار 471 پوائنٹس کی سطح پر بند ہوا تھا، تاہم آج مارکیٹ نے گزشتہ روز کا خسارہ نہ صرف پورا کیا بلکہ انڈیکس مزید بلندی پر چلا گیا۔

معاشی ماہرین کے مطابق، آج قومی اسمبلی میں مالی سال 27-2026 کے وفاقی بجٹ اور فنانس بل کی متوقع منظوری کے باعث سرمایہ کاروں اور کاروباری حلقوں کا اعتماد بحال ہوا ہے، جس کا براہِ راست مثبت اثر اسٹاک مارکیٹ کے تجارتی حجم پر دیکھنے کو مل رہا ہے۔