سٹاک مارکیٹ میں زبردست تیزی، انڈیکس 5000 پوائنٹس بڑھ گیا

امریکی صدر ڈونلڈ ٹرمپ کے ایران کے ساتھ جنگ ختم کرنے اور انخلاء کے اشارے نے پاکستان سمیت ایشیائی سٹاک مارکیٹوں میں تیزی کا طوفان برپا کر دیا ہے۔ کاروباری ہفتے کے تیسرے روز (بدھ) کے آغاز پر ہی پاکستان سٹاک ایکسچینج میں زبردست خریداری دیکھنے میں آئی، جس کے باعث ہنڈرڈ انڈیکس 5000 سے زائد پوائنٹس کے اضافے کے ساتھ 1 لاکھ 53 ہزار 759 کی نئی بلند ترین سطح پر پہنچ گیا ہے۔

گزشتہ روز بھی مارکیٹ 1900 پوائنٹس کے اضافے کے ساتھ بند ہوئی تھی، تاہم ٹرمپ کے بیان نے آج مارکیٹ کو مزید مہمیز دی ہے۔ ماہرینِ معاشیات کا کہنا ہے کہ مشرقِ وسطیٰ میں کشیدگی کم ہونے کی خبروں سے سپلائی چین بحال ہونے اور تیل کی قیمتوں میں استحکام کی امید پیدا ہوئی ہے، جس کا براہِ راست فائدہ سرمایہ کاروں کو مل رہا ہے۔

ایشیائی مارکیٹوں کی صورتحال: پاکستان کے ساتھ ساتھ دیگر ایشیائی منڈیوں میں بھی تیزی کا رجحان غالب رہا:

جنوبی کوریا (KOSPI): ساڑھے 5 فیصد اضافہ۔

جاپان (Nikkei): تقریباً 5 فیصد اضافہ۔

ہانگ کانگ (Hang Seng): 2 فیصد تیزی۔

چین (Shanghai Composite): ڈیڑھ فیصد اضافہ۔

ملائیشیا (FTSE Bursa): ایک فیصد کا اضافہ ریکارڈ کیا گیا۔