مشرقِ وسطیٰ کشیدگی کے معاشی اثرات؛ وفاقی حکومت کی ترقیاتی بجٹ (PSDP) میں دوسری بار بڑی کٹوتی

مشرقِ وسطیٰ میں جاری کشیدگی اور علاقائی صورتحال کے پیشِ نظر وفاقی حکومت نے ملک میں مالیاتی استحکام برقرار رکھنے کے لیے وفاقی ترقیاتی بجٹ (PSDP) میں دوسری بار بڑی کٹوتی کا فیصلہ کیا ہے۔ وزارتِ خزانہ اور پلاننگ کمیشن کی مشاورت کے بعد مجموعی ترقیاتی بجٹ، جو ابتدائی طور پر ایک ہزار ارب روپے تھا، اب کم کر کے 837.16 ارب روپے مقرر کر دیا گیا ہے۔ ذرائع کے مطابق، گزشتہ ماہ بھی سبسڈی کی فراہمی کے لیے بجٹ میں 100 ارب روپے کا کٹ لگایا گیا تھا، جس کے بعد اب دوسرے مرحلے میں مزید 63 ارب روپے کی کمی کر دی گئی ہے۔

اس فیصلے کے تحت مختلف وزارتوں اور ڈویژنز کے فنڈز میں نمایاں ردوبدل کیا گیا ہے۔ سب سے اہم کٹوتی اراکینِ پارلیمنٹ کے لیے مختص ترقیاتی بجٹ میں کی گئی ہے، جسے 75 ارب روپے سے کم کر کے 63.2 ارب روپے کر دیا گیا ہے۔ اسی طرح آئی ٹی سیکٹر کا بجٹ 18.4 ارب، ریلوے ڈویژن کا 18.5 ارب اور وزارتِ صحت کا ترقیاتی بجٹ محض 11.6 ارب روپے رہ گیا ہے۔ ہائر ایجوکیشن کمیشن (HEC) کے لیے بھی نظرثانی شدہ بجٹ 34.9 ارب روپے مختص کیا گیا ہے، جو تعلیمی منصوبوں پر اثر انداز ہو سکتا ہے۔

دیگر شعبوں میں آبی وسائل ڈویژن کے لیے 106.6 ارب، آزاد کشمیر و گلگت بلتستان کے لیے 67 ارب سے زائد، اور ضم شدہ اضلاع کے لیے 54 ارب روپے سے زائد کا بجٹ برقرار رکھا گیا ہے۔ دفاعی ڈویژن کے لیے نظرثانی شدہ ترقیاتی فنڈز 9 ارب روپے سے زائد مختص کیے گئے ہیں۔ خزانہ ڈویژن کے ذرائع کا کہنا ہے کہ یہ مشکل فیصلہ عالمی سطح پر پیدا ہونے والے معاشی بحران اور خطے کی کشیدگی کے دوران مالیاتی نظم و نسق کو برقرار رکھنے کے لیے ناگزیر تھا، تاکہ قومی معیشت پر اضافی بوجھ کم کیا جا سکے۔