پاکستان میں پٹرول بحران کا خدشہ، آئل کمپنیوں کا حکومت کو ریڈ الرٹ جاری

ملک بھر میں پیٹرولیم مصنوعات کے شدید بحران کا خطرہ پیدا ہو گیا ہے جس پر آئل کمپنیز ایڈوائزری کونسل (OCAC) نے حکومت کو ملک گیر سپلائی چین کی بگڑتی ہوئی صورتحال پر ‘ریڈ الرٹ’ جاری کرتے ہوئے فوری مداخلت کا مطالبہ کیا ہے۔ وزیر توانائی کو لکھے گئے ایک ہنگامی خط میں او سی اے سی نے خبردار کیا ہے کہ پیٹرولیم مصنوعات کی درآمدات میں کسٹم رکاوٹوں کے باعث ملکی سپلائی چین شدید خطرے میں ہے اور اس وقت ملک میں موجود ذخیرہ صرف 15 روز کے لیے کافی ہے۔

خط کے مطابق، اس وقت مقامی سطح پر تقریباً 3 لاکھ 70 ہزار ٹن پیٹرولیم ذخیرہ موجود ہے، تاہم کسٹم کلیئرنس میں غیر معمولی تاخیر اور کسٹم کے ‘وی بوک سسٹم’ میں فنی مسائل کے باعث درآمد شدہ پیٹرول کے کئی کارگو مارکیٹ تک نہیں پہنچ پا رہے۔ مزید برآں، آئل کمپنیوں نے شکایت کی ہے کہ حکومت کی جانب سے 66.7 ارب روپے کے زیرِ التوا پرائس ڈیفرینشل کلیمز کی عدم ادائیگی نے ان پر شدید مالی دباؤ ڈال دیا ہے۔ خط میں یہ بھی انکشاف کیا گیا ہے کہ پاکستان اسٹیٹ آئل (PSO) کو جون 2026 میں مزید پیٹرولیم مصنوعات درآمد کرنے کی اجازت نہ ملنے سے ذخائر پہلے ہی محدود ہو چکے ہیں، جس کے باعث حکومت سے فوری طور پر واجبات کی ادائیگی اور کسٹم رکاوٹیں دور کرنے کا پرزور مطالبہ کیا گیا ہے۔