پنجاب میں بلدیاتی انتخابات کی تاریخ کے تعین کیلئے الیکشن کمیشن کا اہم اجلاس طلب

الیکشن کمیشن آف پاکستان نے پنجاب میں طویل عرصے سے التوا کا شکار بلدیاتی انتخابات کے انعقاد اور پولنگ کی حتمی تاریخ طے کرنے کے لیے ایک اہم مشاورتی اجلاس طلب کر لیا ہے۔ اس سلسلے میں الیکشن کمیشن کی جانب سے پنجاب حکومت کو باقاعدہ مراسلہ بھی ارسال کر دیا گیا ہے۔

الیکشن کمیشن کی جانب سے لکھے گئے خط میں پنجاب حکومت کو ہدایت کی گئی ہے کہ وہ بلدیاتی انتخابات کی تاریخ کے حوالے سے مشاورت کے لیے فوری طور پر صوبائی کابینہ کی کمیٹی تشکیل دے۔ مراسلے کے مطابق یہ تمام مشاورتی عمل الیکشن ایکٹ اور پنجاب لوکل گورنمنٹ ایکٹ کے طے شدہ قوانین کے تحت انجام دیا جائے گا۔

الیکشن کمیشن کے فیصلے کے مطابق یہ اہم مشاورتی اجلاس 20 اگست کو صبح 11:00 بجے اسلام آباد میں الیکشن کمیشن کے مرکزی دفتر میں منعقد ہوگا۔ اجلاس میں صوبائی کابینہ کی کمیٹی اور الیکشن کمیشن کے اعلیٰ حکام کے مابین پنجاب میں بلدیاتی انتخابات کی پولنگ کی تاریخ کا حتمی جائزہ اور اعلان کے حوالے سے مشاورت کی جائے گی۔