جعلی ویڈیو کیس: عظمیٰ بخاری کی ویڈیو لنک پر بیان ریکارڈ کرانے کی درخواست خارج

لاہور کی سیشن کورٹ نے صوبائی وزیر اطلاعات پنجاب عظمیٰ بخاری کی مبینہ جعلی ویڈیو سے متعلق مقدمے میں ان کی ویڈیو لنک کے ذریعے بیان ریکارڈ کرانے کی درخواست خارج کر دی ہے۔ عدالت نے جوڈیشل مجسٹریٹ کا فیصلہ بحال رکھتے ہوئے عظمیٰ بخاری کو آئندہ سماعت پر ذاتی حیثیت میں پیش ہو کر بیان قلمبند کرانے کا حکم دیا ہے۔

ایڈیشنل سیشن جج نصرت علی صدیقی نے کیس کا فیصلہ سنایا۔ واضح رہے کہ عظمیٰ بخاری نے پی ٹی آئی سے تعلق رکھنے والی فلک جاوید کے خلاف نیشنل کاؤنٹر کرائم انویسٹی گیشن ایجنسی (NCCIA) میں مقدمہ درج کروا رکھا ہے۔

عظمیٰ بخاری کی جانب سے دائر نگران درخواست میں موقف اختیار کیا گیا تھا کہ وہ صوبائی وزیر ہیں اور ان کی جان کو شدید خطرات لاحق ہیں۔ درخواست میں مؤقف اپنایا گیا کہ آئے روز عدالتوں کے احاطے میں فائرنگ کے واقعات رونما ہوتے ہیں، لہٰذا سیکورٹی خدشات کے پیش نظر عدالت ویڈیو لنک کے ذریعے بیان ریکارڈ کرنے کی اجازت دے اور جوڈیشل مجسٹریٹ کے فیصلے کو کالعدم قرار دے۔

دوسری جانب فلک جاوید کے وکیل میاں علی اشفاق نے ویڈیو لنک درخواست کی مخالفت کرتے ہوئے موقف اپنایا کہ عظمیٰ بخاری اس مقدمے کی مدعیہ ہیں، اس لیے انہیں خود عدالت میں پیش ہو کر قانون کے مطابق اپنا بیان قلمبند کروانا چاہیے۔ عدالت نے دلائل مکمل ہونے پر جوڈیشل مجسٹریٹ کے حکم کو درست قرار دیتے ہوئے درخواست خارج کر دی اور صوبائی وزیر کو خود عدالت میں حاضر ہونے کی ہدایت کی۔