پاکستان اور یورپی یونین کے پارلیمانی روابط کو مزید فروغ دینا ہو گا: ایاز صادق

سپیکر قومی اسمبلی سردار ایاز صادق نے کہا ہے کہ پاکستان یورپی یونین کے ساتھ اپنے دوستانہ تعلقات کو انتہائی اہمیت دیتا ہے اور دونوں ایوانوں کے درمیان پارلیمانی روابط، تجارتی تعاون اور تعلیم کے شعبوں میں روابط کو مزید مستحکم بنانے کی اشد ضرورت ہے۔

ان خیالات کا اظہار انہوں نے پارلیمنٹ ہاؤس اسلام آباد میں یورپی پارلیمنٹ کے رکن اوندرے دوستال (Ondřej Dostál) سے ملاقات کے دوران کیا۔ ملاقات میں پاک-یورپی یونین تعلقات، پارلیمانی سفارت کاری، موسمیاتی تبدیلیوں اور علاقائی و عالمی سیکیورٹی امور پر تفصیلی تبادلہ خیال کیا گیا۔

سردار ایاز صادق نے گفتگو کرتے ہوئے کہا کہ پاکستان کا گرین ہاؤس گیسوں کے عالمی اخراج میں حصہ نہایت معمولی ہے، لیکن اس کے باوجود پاکستان موسمیاتی تبدیلی کے منفی اثرات سے سب سے زیادہ متاثر ہونے والے ممالک میں شامل ہے۔ انہوں نے واضح کیا کہ قومی اسمبلی کا ’گرین پارلیمنٹ منصوبہ‘ ماحولیاتی تحفظ اور قابلِ تجدید توانائی کے فروغ کی جانب اہم قدم ہے۔ پارلیمانی اصلاحات کا ذکر کرتے ہوئے سپیکر نے بتایا کہ ویمن پارلیمنٹری کاکس، چائلڈ پارلیمنٹری کاکس اور SDGs سیکرٹریٹ کے ذریعے خواتین، بچوں کے حقوق اور پائیدار ترقی کے اہداف پر مؤثر کام کیا جا رہا ہے۔

علاقائی امن و سفارت کاری پر بات کرتے ہوئے ایاز صادق نے کہا کہ پاکستان تنازعات کے پرامن حل کے لیے ہمیشہ مذاکرات اور سفارتی ذرائع کو ترجیح دیتا ہے، جس کی واضح مثال ایران اور امریکہ کے درمیان کشیدگی کے خاتمے کے لیے پاکستان کا ثالثی کردار ہے۔ انہوں نے کہا کہ پاکستان کے پاس باصلاحیت اور ہنرمند افرادی قوت موجود ہے جس سے یورپی یونین استفادہ کر سکتی ہے۔ اس موقع پر یورپی پارلیمنٹ کے رکن اوندرے دوستال نے پاکستان کی علاقائی امن، پارلیمانی سفارت کاری اور بالخصوص شمالی علاقہ جات کے فطری حسن کی تعریف کی۔