رائس مل سے ایک کروڑ 90 لاکھ کے چاول بغیر پیمنٹ اٹھائے جانے کا انکشاف

پبلک اکاؤنٹس کمیٹی کے اجلاس میں ایک کروڑ 90 لاکھ روپے مالیت کے چاول بغیر ادائیگی کے ایک رائس مل سے اٹھائے جانے کا انکشاف ہوا ہے۔ معین عامر پیرزادہ کی زیر صدارت منعقدہ اس اجلاس میں فنانس ڈویژن کے آڈٹ اعتراضات کا جائزہ لیا گیا، جس کے دوران یہ بات سامنے آئی کہ بینک کے ایک قرض دار نے غیر قانونی طور پر اسٹاک غائب کیا۔

کمیٹی ارکان، بالخصوص سید نوید قمر نے اس معاملے پر گہری تشویش کا اظہار کرتے ہوئے اسے “انتہائی خطرناک” قرار دیا۔ سیکرٹری فنانس نے کمیٹی کو بتایا کہ اب تک ایک کروڑ 40 لاکھ روپے کی ریکوری کی جا چکی ہے۔ چیئرمین کمیٹی نے بینک انتظامیہ کی کارکردگی پر سخت برہمی کا اظہار کرتے ہوئے سوال کیا کہ جب پوری رات چاول لوڈ ہوتے رہے تو بینک نے کوئی کارروائی کیوں نہیں کی اور پولیس کو بروقت مطلع کیوں نہیں کیا گیا۔

کمیٹی نے بینک کی جانب سے کمپنی کے خلاف اب تک کوئی ٹھوس ایکشن نہ لینے پر بھی ناراضگی ظاہر کی۔ بینک کے صدر کی جانب سے کمپنی کو معطل کرنے کی اطلاع پر چیئرمین نے ہدایت جاری کی کہ اگلے 15 دن کے اندر کمپنی کے خلاف کی گئی قانونی کارروائی کی تفصیلی رپورٹ پیش کی جائے۔