دودھ کے بغیر کیلشیئم حاصل کرنے کی بہترین غذائیں ، نئی تحقیق میں اہم حقائق سامنے آگئے

کیلشیئم انسانی جسم کے لیے بنیادی ترین منرلز میں شمار ہوتا ہے جو ہڈیوں، دانتوں، دل اور مسلز کے درست افعال کے لیے ضروری ہے، مگر بہت سے افراد اس کی کمی کا شکار رہتے ہیں جس کے نتیجے میں ہڈیوں کی کمزوری اور دیگر مسائل جنم لیتے ہیں۔ اکثر لوگ کیلشیئم کے لیے دودھ پر انحصار کرتے ہیں، لیکن ایسے بھی کئی افراد ہیں جو دودھ پسند نہیں کرتے یا استعمال نہیں کر پاتے۔ خوش قسمتی سے متعدد ایسی غذائیں موجود ہیں جن میں دودھ سے بھی زیادہ کیلشیئم پایا جاتا ہے۔

ماہرین کے مطابق تِل کیلشیئم کا نہایت بہترین ذریعہ ہیں۔ ایک کھانے کا چمچ تِل تقریباً 88 ملی گرام کیلشیئم فراہم کرتا ہے، جبکہ یہ پروٹین، منرلز اور اینٹی آکسائیڈنٹس سے بھی بھرپور ہوتے ہیں، جو مجموعی صحت کے لیے فائدہ مند ہیں۔

اسی طرح چیا سیڈز (تخمِ شربتی) غذائیت کے اعتبار سے غیر معمولی اہمیت رکھتے ہیں۔ 2 سے 3 کھانے کے چمچ چیا سیڈز 179 ملی گرام تک کیلشیئم فراہم کرتے ہیں۔ ان بیجوں کا استعمال ہاضمے کی بہتری، بلڈ پریشر میں کمی اور بلڈ شوگر کو کنٹرول میں رکھنے میں بھی موثر ثابت ہوتا ہے۔

کیلشیئم کے بہترین ذرائع میں مچھلی کو بھی اہم مقام حاصل ہے۔ ماہرین کے مطابق 100 گرام مچھلی میں تقریباً 300 ملی گرام کیلشیئم موجود ہوتا ہے، جبکہ اسی غذا میں اومیگا تھری فیٹی ایسڈز اور وٹامن ڈی کی زیادہ مقدار ہڈیوں اور دل کی صحت کے لیے اضافی فائدہ پہنچاتی ہے۔

بادام بھی کیلشیئم کا بھرپور ذریعہ ہیں، 100 گرام بادام میں 269 ملی گرام تک کیلشیئم پایا جاتا ہے۔ اس کے ساتھ ساتھ بادام پروٹین، فائبر اور صحت بخش چکنائیوں سے لیس ہوتے ہیں، جو کولیسٹرول کی سطح بہتر بنانے، بلڈ پریشر کو معمول پر رکھنے اور بلڈ شوگر کنٹرول کرنے میں بھی مدد دیتے ہیں۔

کیلشیئم کے حصول کے لیے خشک انجیر بھی نہایت مفید ہے۔ 3 سے 5 خشک انجیروں سے تقریباً 68 ملی گرام کیلشیئم فراہم ہوتا ہے، جبکہ انجیر میں موجود پوٹاشیم ہڈیوں کی کثافت بہتر بنانے میں اہم کردار ادا کرتا ہے۔ ماہرین کے مطابق پوٹاشیم اور کیلشیئم کا امتزاج عمر بڑھنے کے ساتھ ہڈیوں کو کمزور ہونے سے تحفظ دیتا ہے۔

نوٹ: یہ مواد طبی تحقیقی رپورٹس پر مبنی ہے۔ اپنی صحت کے حوالے سے معالج سے مشورہ کرنا لازمی ہے۔