این ڈی ایم اے کا 24 جولائی تک سیلاب اور لینڈ سلائیڈنگ کا الرٹ جاری

نیشنل ڈیزاسٹر مینجمنٹ اتھارٹی (NDMA) نے 24 جولائی تک ملک کے مختلف علاقوں بشمول پنجاب، خیبر پختونخوا، گلگت بلتستان اور آزاد کشمیر کے ندی نالوں اور دریاؤں میں طغیانی، آربن فلڈنگ اور لینڈ سلائیڈنگ کا شدید الرٹ جاری کر دیا ہے۔ ترجمان این ڈی ایم اے کے مطابق 21 سے 23 جولائی کے دوران گلگت بلتستان اور چترال میں لینڈ سلائیڈنگ اور جگلوٹ اسکردو روڈ (آر ڈی 20 تا 80) سمیت حساس شاہراہیں بند ہونے کا خدشہ ہے، جبکہ دریائے چناب اور جہلم کے بالائی علاقوں میں اونچے درجے کے سیلاب کی توقع ہے۔ این ڈی ایم اے نے تمام ضلعی انتظامیہ کو ہنگامی ٹیمیں متحرک رکھنے، حساس مقامات کی مسلسل نگرانی کرنے اور عوام کو پہاڑی علاقوں کے غیر ضروری سفر سے گریز کی ہدایت کی ہے۔