این ڈی ایم اے کا 24 جولائی تک سیلاب اور لینڈ سلائیڈنگ کا الرٹ جاری

نیشنل ڈیزاسٹر مینجمنٹ اتھارٹی (این ڈی ایم اے) نے 24 جولائی تک ملک کے تمام صوبوں، آزاد کشمیر اور گلگت بلتستان کے لیے شدید سیلاب، دریاؤں میں طغیانی، شہری علاقوں میں اربن فلڈنگ اور لینڈ سلائیڈنگ کے خطرات کے پیشِ نظر ہائی الرٹ جاری کر دیا ہے۔ این ڈی ایم اے کے مطابق پنجاب، خیبر پختونخوا، بلوچستان اور گلگت بلتستان کے ندی نالوں اور پہاڑی برساتی گزرگاہوں میں اچانک سیلابی ریلوں کا شدید خدشہ ہے، جبکہ دریائے چناب، جہلم کے بالائی علاقوں، اور پنجاب و پوٹھوہار کے اضلاع بشمول راولپنڈی، گوجرانوالہ، سیالکوٹ اور لاہور کے شہری علاقوں میں سیلابی صورتِ حال پیدا ہو سکتی ہے۔

اس کے علاوہ 21 سے 23 جولائی تک چترال، گلگت بلتستان اور جگلوٹ اسکردو روڈ سمیت متعدد پہاڑی راستوں پر لینڈ سلائیڈنگ اور ملبے کے ریلوں کا الرٹ بھی جاری کیا گیا ہے۔ این ڈی ایم اے نے تمام ضلعی انتظامیہ اور متعلقہ اداروں کو امدادی ٹیمیں تیار رکھنے اور حساس شاہراہوں کی بحالی کے لیے چوکنا رہنے کی ہدایت کی ہے۔ جبکہ عوام سے اپیل کی گئی ہے کہ وہ غیر ضروری سفر سے گریز کریں اور ندی نالوں یا طغیانی والے علاقوں کو عبور نہ کریں۔