مرتضیٰ وہاب کا کراچی کی ترقی اور سڑکوں کی تعمیر پر میڈیا ٹاک

کراچی کے میئر مرتضیٰ وہاب نے میڈیا سے گفتگو کرتے ہوئے شہر کی ترقی اور سڑکوں کی تعمیر کے حوالے سے واضح موقف پیش کیا۔ انہوں نے کہا کہ کچھ لوگ سڑکیں بلاک کر کے منافقانہ رویہ دکھا رہے ہیں، جس سے شہریوں کو شدید تکلیف ہوتی ہے۔

مرتضیٰ وہاب نے کہا کہ کراچی کی سڑکیں کسی کے ذاتی مال نہیں اور جب شہر میں کاروائی ہوگی تو آنسو بہانے کی ضرورت نہیں۔ انہوں نے نارتھ کراچی ٹاؤن میں اربوں روپے کے منصوبوں پر بھی سوال اٹھایا اور کہا کہ اس کا جواب دیا جانا چاہیے۔

میئر نے شہریوں سے اپیل کی کہ تعصب اور تفریق کی باتیں ختم کریں اور سب مل کر شہر کی ترقی کو یقینی بنائیں۔ انہوں نے زور دیا کہ سیاست گٹر کے ڈھکن یا بنیادی شہری سہولیات پر نہیں ہونی چاہیے۔

مرتضیٰ وہاب نے گلستان جوہر ایندڑ بائی پاس میں پیور بلاکس کی تنصیب کا ذکر کرتے ہوئے کہا کہ یہ کم خرچ اور مضبوط تعمیراتی طریقہ ہے، جسے یورپ میں بھی عام طور پر استعمال کیا جاتا ہے۔

آخر میں انہوں نے سابق وزیراعظم عمران خان پر طنز کرتے ہوئے کہا کہ جو سب کو ڈاکو کہتے تھے، ان کا تکبر اب ختم ہو چکا ہے اور دنیا گول ہے۔