اسلام آباد میں کسی کو بدامنی پھیلانے کی اجازت نہیں دی جا سکتی، سپیکر پنجاب اسمبلی

اسپیکر پنجاب اسمبلی ملک محمد احمد خان نے واضح کیا ہے کہ وفاقی دارالحکومت اسلام آباد میں کسی بھی طبقے یا جماعت کو بدامنی اور انتشار پھیلانے کی مطلق اجازت نہیں دی جا سکتی۔ اپنے ایک اہم بیان میں اسپیکر پنجاب اسمبلی کا کہنا تھا کہ کچھ عناصر اسلام آباد داخل ہو کر سپریم کورٹ آف پاکستان جیسے اعلیٰ آئینی ادارے کی کارروائیوں پر اثر انداز ہونے کا ارادہ رکھتے ہیں۔ انہوں نے سخت تنقید کرتے ہوئے کہا کہ ہر سال اسلام آباد میں جتھوں کی شکل میں آ کر ہنگامہ آرائی کی جاتی ہے اور ایک مخصوص سیاسی جماعت مسلسل اس عمل کو دہراتی رہی ہے۔

ان کا یہ بیان ایک ایسے وقت میں سامنے آیا ہے جب پاکستان تحریک انصاف (پی ٹی آئی) کی جانب سے 4 اکتوبر کو اسلام آباد مارچ کا اعلان کیا گیا ہے۔ ملک میں سیاسی تناؤ اور حکومتی تدابیر کے ساتھ ساتھ امن و امان کی صورت حال کو قابو میں رکھنے کے لیے ایک طرف سیکیورٹی کے سخت اقدامات کیے جا رہے ہیں جبکہ دوسری جانب فریقین کے درمیان تنازع کے حل کے لیے مذاکراتی عمل بھی جاری ہے۔