پاکستان کا غزہ میں عالمی قانون کی پاسداری یقینی بنانے، کشمیریوں کے حق خودارادیت کا اعادہ

اقوام متحدہ میں پاکستان کے نائب مستقل مندوب عثمان جدون نے عالمی برادری پر زور دیا ہے کہ غزہ میں نہتے شہریوں کے تحفظ، بلا تعطل اور بلا رکاوٹ انسانی امداد کی فراہمی اور بین الاقوامی قوانین کی پاسداری کو ہر صورت یقینی بنایا جائے۔ اپنے اہم بیان میں پاکستانی مندوب نے کہا کہ اقوام متحدہ کے انسانی حقوق کے نظام کی عالمی ساکھ کا انحصار اصولوں اور ان پر عملی در آمد کے درمیان پائے جانے والے تضاد اور خلیج کو ختم کرنے میں مضمر ہے، کیونکہ عالمی قوانین کو ایک جگہ لاگو کرنا اور دوسری جگہ مکمل نظر انداز کرنا کسی صورت قابلِ قبول نہیں۔

عثمان جدون نے واضح کیا کہ غزہ میں فلسطینیوں پر ٹوٹنے والے مظالم عالمی برادری کے انسانی حقوق کے لیے کیے گئے عزم کا سب سے بڑا امتحان ہیں۔ انہوں نے فلسطینیوں کے ناقابلِ تنسیخ حقِ خود ارادیت کی مکمل حمایت کا اعادہ کرتے ہوئے کہا کہ یہی حقِ خود ارادیت مقبوظہ جموں و کشمیر کے عوام پر بھی یکساں طور پر لاگو ہوتا ہے، جو گزشتہ آٹھ دہائیوں سے اقوام متحدہ کی سلامتی کونسل کی قراردادوں پر عملدرآمد کے منتظر ہیں۔ انہوں نے اسلاموفوبیا، نسل پرستی اور مذہبی تعصب کے خلاف عالمی سطح پر مشترکہ اقدامات کی ضرورت پر زور دیا اور کہا کہ انسانی وقار کا تعین کسی کے مذہب يا شناخت کے بجائے بلا امتیاز انصاف سے ہونا چاہیے۔