سسٹم ری سیٹ ہونے والا ہے، چیزیں بہت بہتر ہو جائیں گی: محسن نقوی

وفاقی وزیر داخلہ محسن نقوی نے کہا ہے کہ ملک کا تمام تر سیاسی و معاشی سسٹم جلد ری سیٹ ہونے والا ہے اور اس عمل کے مکمل ہوتے ہی حالات میں نمایاں بہتری آئے گی۔ لاہور چیمبر آف کامرس اینڈ انڈسٹری (LCCI) میں ایک تقریب سے خطاب کرتے ہوئے وزیر داخلہ نے تاجر برادری پر زور دیا کہ جب تک بزنس کمیونٹی ساتھ نہیں دے گی، تب تک ملک کو درست سمت میں ری سیٹ نہیں کیا جا سکتا۔

محسن نقوی نے معاشی بحران کا حل برآمدات میں اضافے کو قرار دیتے ہوئے کہا کہ ہمیں دیگر ممالک سے سبق سیکھنا چاہیے؛ اگر ایران تمام تر عالمی پابندیوں کے باوجود اپنی ضرورت کی چیزیں خود بنا سکتا ہے تو پاکستان کیوں نہیں؟ انہوں نے اعلان کیا کہ حکومت گزشتہ چند ماہ سے “بزنس پاسپورٹ” کے جامع منصوبے پر کام کر رہی ہے، جسے جلد حتمی شکل دے کر وزیراعظم کے سامنے پیش کیا جائے گا تاکہ تاجروں کے تمام سفری و تجارتی مسائل کو ترجیحی بنیادوں پر حل کیا جا سکے۔