مومنہ اقبال ہراسگی کیس: ثاقب چدھڑ اور اہلیہ کی عبوری ضمانت میں توسیع

لاہور کی سیشن کورٹ نے نامور اداکارہ مومنہ اقبال کو ہراساں کرنے اور جان سے مارنے کی دھمکیاں دینے کے کیس میں پاکستان مسلم لیگ (ن) کے ایم پی اے ثاقب چدھڑ اور ان کی اہلیہ سمیرا کی عبوری ضمانت میں 28 جولائی تک توسیع کر دی ہے۔ ایڈیشنل اینڈ سیشن جج نصرت علی صدیقی نے ملزمان کی درخواستِ ضمانت پر سماعت کی، جس کے دوران لیگی رہنما اپنی اہلیہ کے ہمراہ عدالت میں پیش ہوئے۔ سماعت کے دوران تفتیشی افسر نے عدالت کو آگاہ کیا کہ ثاقب چدھڑ کی اہلیہ سمیرا شاملِ تفتیش ہو چکی ہیں، تاہم مقدمے کی حتمی تفتیش مکمل کرنے کے لیے پولیس کو مزید وقت درکار ہے۔ واضح رہے کہ نیشنل سائبر کرائم انویسٹی گیشن ایجنسی (NCCIA) نے اداکارہ مومنہ اقبال کی مدعیت میں ملزمان کے خلاف ہراسانی اور دھمکیوں کا مقدمہ درج کر رکھا ہے، جس میں اب عدالت نے تفتیش مکمل کرنے کے لیے مہلت دیتے ہوئے ضمانت کی معیاد بڑھا دی ہے۔