دنیا کے بڑے کنٹینر جہازوں میں شامل MSC ERICA کراچی پورٹ پہنچ گیا

دنیا کے سب سے بڑے میگا کنٹینر بحری جہازوں میں شمار ہونے والا ‘MSC ERICA’ کراچی بندرگاہ پر پہنچ گیا ہے، جس کی آمد نے ثابت کر دیا ہے کہ کراچی پورٹ ٹرسٹ (KPT) انتہائی بڑے جہازوں کو محفوظ طریقے سے سنبھالنے کی مکمل صلاحیت رکھتا ہے۔ ترجمان کے پی ٹی کے مطابق، 398.5 میٹر طویل اور 59 میٹر چوڑے اس عظیم الجثہ جہاز کی گنجائش 20 ہزار ٹی ای یوز (TEUs) ہے، جب کہ اس کا گراس ٹنیج 1 لاکھ 94 ہزار 308 میٹرک ٹن ہے۔ کراچی پورٹ پر قیام کے دوران اس میگا جہاز سے 3 ہزار سے زائد کنٹینرز کی ہینڈلنگ کی جائے گی، جس کے بعد یہ اپنی اگلی منزل دالیان (چین) کے لیے روانہ ہو جائے گا۔ جہاز کے کپتان (ماسٹر) نے کے پی ٹی پائلٹس کی اعلیٰ پیشہ ورانہ مہارت، محفوظ رہنمائی اور شاندار مہمان نوازی کی تعریف کرتے ہوئے کراچی پورٹ کو خطے کی بہترین اور محفوظ ترین بندرگاہوں میں سے ایک قرار دیا ہے۔