موریطانیہ کشتی حادثہ کیس، انسانی سمگلر طارق محمود کو 10 سال قید بامشقت کی سزا

موریطانیہ کشتی حادثہ کیس میں وفاقی تحقیقاتی ادارے (ایف آئی اے) کو ایک اہم قانونی کامیابی حاصل ہو گئی ہے، جہاں سپیشل جج سنٹرل ون نے انسانی سمگلنگ میں ملوث مجرم طارق محمود کو مجموعی طور پر 10 سال قیدِ بامشقت اور 20 لاکھ روپے جرمانے کی سزا سنا دی ہے۔

ایف آئی اے حکام کے مطابق مجرم طارق محمود نے دو نوجوانوں کو غیر قانونی طور پر یورپی ملک اسپین بھجوانے کا جھانسہ دے کر متاثرہ خاندان سے 80 لاکھ روپے کی بھاری رقم وصول کی تھی، تاہم اس خطرناک سفر کے دوران پیش آنے والے موریطانیہ کشتی حادثے میں متاثرہ خاندان کا بیٹا اور بھتیجا دونوں جاں بحق ہو گئے تھے۔

عدالت نے ٹھوس شواہد اور گواہوں کے بیانات کی روشنی میں جرم ثابت ہونے پر مجرم طارق محمود کو ایمیگریشن آرڈیننس کی دفعہ 22 بی کے تحت 10 سال قیدِ بامشقت اور 10 لاکھ روپے جرمانہ، دفعہ 17 ٹو بی کے تحت 4 سال قید اور 5 لاکھ روپے جرمانہ جبکہ پریوینشن آف سمگلنگ آف مائیگرنٹس ایکٹ کے تحت 7 سال قید اور 5 لاکھ روپے جرمانے کی سزا سنائی۔ اس کے علاوہ عدالت نے مجرم کو حکم دیا ہے کہ وہ جاں بحق ہونے والے دونوں نوجوانوں کے ورثاء مصباح بی بی اور محمد جعفر کو 10، 10 لاکھ روپے بطورِ ہرجانہ بھی ادا کرے۔

عدالتی فیصلے میں واضح کیا گیا ہے کہ مجرم کی تمام سزائیں بیک وقت نافذ العمل ہوں گی، جبکہ جرمانے اور ہرجانے کی رقم ادا نہ کرنے کی صورت میں مجرم کو مزید 6 ماہ قید بھگتنا ہوگی۔