لاس اینجلس ایئرپورٹ (LAX) پر پروازوں کی منسوخی اور تاخیر کے اعلانات کا سلسلہ جاری، ہزاروں مسافر فرش پر بیٹھنے پر مجبور

امریکا میں ملک گیر فضائی تعطل (گراؤنڈ اسٹاپ) کے باعث لاس اینجلس انٹرنیشنل ایئرپورٹ (ایل اے ایکس) پر صورتحال انتہائی کشیدہ ہو گئی ہے، جہاں پروازوں کی منسوخی اور تاخیر کے مسلسل اعلانات کے باعث مسافروں کو ایک طویل اور کٹھن رات کا سامنا ہے۔ ایئرپورٹ سے موصولہ تازہ ترین اطلاعات کے مطابق ٹرمینل 4 میں موجود بیشتر مسافر امریکا کے مشرقی ساحل (ایسٹ کوسٹ) یا یورپ جانے والی پروازوں کے منتظر ہیں، تاہم روانگی بورڈز پر منسوخیوں کے انبار لگنے کے بعد ان کی روانگی کے امکانات معدوم ہوتے جا رہے ہیں جس کی وجہ سے متعدد مسافروں نے چیک اِن کاؤنٹرز کی قطاریں چھوڑ کر فرش پر بیٹھ کر فون کے ذریعے ایئر لائنز سے رابطہ کرنے کی کوششیں شروع کر دی ہیں۔ حکام کے مطابق ایئرپورٹ کے انٹرنیشنل ٹرمینل سے مغرب کی جانب جانے والی چند پروازیں روانہ ہو رہی ہیں، تاہم یہاں سے سفر کرنے والے تقریباً 70 فیصد مسافروں کی منزل امریکا کے دیگر حصے ہیں جو شدید بے یقینی کی کیفیت میں مبتلا ہیں۔