محکمہ صحت پنجاب کے متعدد میڈیکل سپرنٹنڈنٹس کے تقرر و تبادلے کے احکامات جاری

محکمہ صحت پنجاب نے انتظامی بہتری اور طبی سہولیات کی فراہمی کو مؤثر بنانے کے لیے صوبے بھر کے متعدد بڑے سرکاری اور ٹیچنگ ہسپتالوں کے میڈیکل سپرنٹنڈنٹس (ایم ایس) کے بڑے پیمانے پر تقرر و تبادلوں کے باضابطہ احکامات جاری کر دیے ہیں، جس کے تحت کئی افسران کو نئی ذمہ داریاں سونپ دی گئیں جبکہ بعض ایم ایس کو عہدوں سے ہٹا کر محکمہ صحت کو رپورٹ کرنے کی ہدایت کی گئی ہے۔

محکمہ صحت کی جانب سے جاری کردہ نوٹیفکیشن کے مطابق لاہور کے اہم ہسپتالوں میں کی گئی تعیناتیوں کے تحت ڈاکٹر ذیشان حیدر کو ریگولر بنیادوں پر ایم ایس جناح ہسپتال لاہور تعینات کر دیا گیا ہے۔ اسی طرح ڈاکٹر فرح انعام کو گورنمنٹ ٹیچنگ ہسپتال شاہدرہ لاہور، ڈاکٹر محمد شہباز کو میاں منشی ڈی ایچ کیو ٹیچنگ ہسپتال لاہور اور ڈاکٹر عافیہ زیب کو پنجاب ڈینٹل ہسپتال لاہور کا نیا ایم ایس مقرر کیا گیا ہے، جبکہ ڈاکٹر ثمرہ زہرہ کو ایم ایس لیڈی ولنگڈن ہسپتال لاہور کے عہدے سے ہٹا کر محکمہ صحت کو رپورٹ کرنے کا حکم دیا گیا ہے اور ان کی جگہ ڈاکٹر ظلِ ہما کو لیڈی ولنگڈن ہسپتال کا نیا ایم ایس تعینات کیا گیا ہے۔

نوٹیفکیشن کے مطابق گوجرانوالہ ٹیچنگ ہسپتال میں ڈاکٹر امتیاز احمد رانا کو عہدے سے ہٹا کر ڈاکٹر کاشف بشیر چوہدری کو نیا ایم ایس مقرر کیا گیا ہے۔ سیالکوٹ اور نارووال میں کی گئی تعیناتیوں کے تحت ڈاکٹر عامر محمد کو ڈی ایچ کیو ٹیچنگ ہسپتال نارووال، ڈاکٹر غلام مصطفیٰ ساحر کو علامہ اقبال میموریل ٹیچنگ ہسپتال سیالکوٹ اور ڈاکٹر انیل کمار کو گورنمنٹ سردار بیگم ٹیچنگ ہسپتال سیالکوٹ کا ایم ایس تعینات کیا گیا ہے۔ مزید برآں عزیز بھٹی شہید ٹیچنگ ہسپتال گجرات میں ڈاکٹر سعود افضل کو عہدے سے ہٹا کر ڈاکٹر محمد کاشف شہزاد ورک کو نیا میڈیکل سپرنٹنڈنٹ مقرر کیا گیا ہے، جبکہ ڈاکٹر ہارون طاہر کو ڈی ایچ کیو ٹیچنگ ہسپتال میانوالی کا ایم ایس تعینات کیا گیا ہے۔

جنوبی پنجاب کے ہسپتالوں میں ہونے والی اہم تبدیلیوں کے مطابق ڈاکٹر عبدالقادر خان کو نشتر ہسپتال ملتان کا ایم ایس مقرر کیا گیا ہے، جبکہ ڈاکٹر صائمہ بتول سومرہ کو ٹرشری کیئر ہسپتال نشتر ٹو ملتان کی ذمہ داریاں سونپ دی گئی ہیں۔ چودھری پرویز الٰہی انسٹیٹیوٹ آف کارڈیالوجی ملتان میں ڈاکٹر ریاض احمد کو عہدے سے ہٹا کر محکمہ صحت کو رپورٹ کرنے کی ہدایت کی گئی ہے اور ان کی جگہ ڈاکٹر فرحان خان کو نیا ایم ایس تعینات کیا گیا ہے۔

اسی طرح بہاولپور کے بہاول وکٹوریہ ہسپتال میں ڈاکٹر عبدالرحمان کو ایم ایس کے عہدے سے ہٹا کر محکمہ صحت رپورٹ کرنے کا حکم دیتے ہوئے ڈاکٹر سید فخر عباس شاہ کو نیا ایم ایس مقرر کیا گیا ہے، جبکہ ڈاکٹر سخاوت علی رندھاوا کو حب اینڈ سپوک ماڈل ہسپتال ظاہر پیر (رحیم یار خان) کا ایم ایس تعینات کیا گیا ہے۔ ڈیرہ غازی خان کے علامہ اقبال ٹیچنگ ہسپتال میں ڈاکٹر محمد ظفر اقبال کو عہدے سے ہٹا کر ڈاکٹر محمد عمران خان کو نیا ایم ایس مقرر کیا گیا ہے، جبکہ ساہیوال ٹیچنگ ہسپتال میں ڈاکٹر فیصل وحید کی جگہ ڈاکٹر زاہد احمد کو نیا میڈیکل سپرنٹنڈنٹ تعینات کر دیا گیا ہے۔