شالیمار ایکسپریس کے انجن میں ویڈیو بنانے کا معاملہ: خواجہ سراؤں سمیت ٹرین ڈرائیورز گرفتار

شالیمار ایکسپریس کے انجن میں دو خواجہ سراؤں کے سفر کی وائرل ویڈیو کو جعلی قرار دینے کا ریلوے ترجمان کا ابتدائی دعویٰ غلط ثابت ہو گیا ہے، جبکہ واقعے کا باضابطہ مقدمہ درج کر کے ٹرین ڈرائیور، اسسٹنٹ ڈرائیور اور دونوں خواجہ سراؤں کو گرفتار کر لیا گیا ہے۔

سوشل میڈیا پر ویڈیو وائرل ہونے کے چار روز بعد مقدمے کے اندراج اور ملزمان کی گرفتاریوں کی تفصیلات سامنے آ گئی ہیں، جن سے تصدیق ہوئی ہے کہ انجن میں سفر کا یہ واقعہ حقیقت پر مبنی تھا۔ ریلوے پولیس میں درج ایف آئی آر کے متن کے مطابق یہ واقعہ 4 اور 5 نومبر کی درمیانی شب ساہیوال سے لاہور آنے والی شالیمار ایکسپریس میں پیش آیا، جہاں ٹرین ڈرائیور امتیاز اور اسسٹنٹ ڈرائیور ثقلین حیدر نے ضابطے کی خلاف ورزی کرتے ہوئے دو خواجہ سراؤں کو لوکوموٹیو انجن میں سوار کروایا۔

مقدمے کے اندراج میں بتایا گیا ہے کہ شالیمار ایکسپریس کے انجن نمبر 9016 میں دونوں خواجہ سراؤں نے ساہیوال سے رائیونڈ تک کا سفر طے کیا۔ دورانِ سفر خواجہ سرا علی احمد عرف حانیہ اسسٹنٹ ڈرائیور کی مخصوص نشست پر بیٹھے رہے، جبکہ دوسرے خواجہ سرا محمد علی عرف علی جان نے انجن کے اندر سفر کی ویڈیو ریکارڈ کی جو بعد ازاں سوشل میڈیا پر وائرل ہو گئی۔ مزید برآں، مذکورہ خواجہ سراؤں کی جانب سے یوسف والا ریلوے سٹیشن پر بنائی گئی ایک اور ویڈیو بھی منظرِ عام پر آ چکی ہے۔

ایف آئی آر میں مؤقف اختیار کیا گیا ہے کہ حساس نوعیت کے ریلوے انجن میں غیر متعلقہ افراد کو سوار کر کے ٹرین ڈرائیور اور اسسٹنٹ ڈرائیور نے نہ صرف ریلوے قوانین کی سنگین خلاف ورزی کی بلکہ ٹرین میں سوار سینکڑوں مسافروں کی جان و مال کو بھی خطرے میں ڈالا۔ اس واقعے پر مقدمہ نمبر 123/26 درج کیا گیا ہے، جس میں پاکستان ریلوے ایکٹ کی دفعات 101، 113 اور 120 جبکہ تعزیراتِ پاکستان (PPC) کی دفعات 34 اور 500 شامل کی گئی ہیں۔

کارروائی کے دوران ریلوے پولیس نے ٹرین ڈرائیور امتیاز، اسسٹنٹ ڈرائیور ثقلین حیدر اور دونوں خواجہ سراؤں کو گرفتار کر لیا ہے۔ قبل ازیں ریلوے ترجمان نے مؤقف اپنایا تھا کہ وائرل ویڈیو میں ردوبدل کر کے اسے تیار کیا گیا ہے اور ویڈیو کو جعلی قرار دیا تھا، تاہم ایف آئی آر کے مندرجات اور گرفتاریوں نے ترجمان کے دعوے کی نفی کرتے ہوئے واقعے کی تصدیق کر دی ہے۔ حکام کے مطابق واقعے کی مزید تفتیش متعلقہ تفتیشی افسر کے سپرد کر دی گئی ہے اور ملزمان کے خلاف قانونی کارروائی جاری ہے۔