صوبوں پر ریفرنڈم ہو بھی جائے تو معاملہ پارلیمنٹ نے طے کرنا ہے: رانا ثنا اللہ

وزیراعظم کے مشیر برائے سیاسی امور رانا ثنا اللہ نے کہا ہے کہ نئے صوبوں کے معاملے پر اگر ریفرنڈم ہو بھی جاتا ہے تب بھی اس معاملے کو حتمی طور پر طے پارلیمنٹ ہی نے کرنا ہے، جبکہ بانی پی ٹی آئی عمران خان کے وکلا کی جانب سے ملاقات کے بعد کی جانے والی سیاسی گفتگو آئندہ ملاقاتوں کے سلسلے میں رکاوٹ بن سکتی ہے۔

ایک نجی ٹیلی ویژن چینل سے خصوصی گفتگو کرتے ہوئے مسلم لیگ (ن) کے سینیئر رہنما رانا ثنا اللہ نے بتایا کہ بانی پی ٹی آئی کے دونوں وکلا نے ان سے ملاقات کی ہے، تاہم ان کا آئندہ رویہ کیا ہوتا ہے یہ آنے والے دنوں میں معلوم ہوگا۔ انہوں نے کہا کہ بانی پی ٹی آئی کے وکلا نے ملاقات کے بعد باہر آ کر سیاسی گفتگو کی ہے، جو قانون و ضوابط کے خلاف اور اگلی ملاقات کے انعقاد میں رکاوٹ ثابت ہو سکتی ہے۔

رانا ثنا اللہ کا مزید کہنا تھا کہ پاکستان تحریک انصاف (پی ٹی آئی) نے لانگ مارچ کی کال دی ہوئی تھی، جس پر انہیں افہام و تفہیم سے سمجھانے کی کوشش کی گئی اور حکومت کی جانب سے ہر طرح کی یقین دہانی کرائی گئی۔ انہوں نے واضح کیا کہ جیل ملاقاتوں پر پابندی کی بنیادی وجہ ہی یہی تھی کہ متعلقہ افراد ان ملاقاتوں کو خالصتاً سیاسی مقاصد اور بیانیہ سازی کے لیے استعمال کرتے ہیں۔

نئے صوبوں کے قیام سے متعلق گردش کرنے والی خبروں اور ریفرنڈم کی تجاویز پر تبصرہ کرتے ہوئے وزیراعظم کے مشیر نے سوال اٹھایا کہ صوبوں کے معاملے پر ریفرنڈم کس نے کرانا ہے؟ ظاہری بات ہے کہ یہ اختیار پارلیمنٹ ہی کے پاس ہے، اور حقیقت یہ ہے کہ یہ معاملہ ابھی تک پارلیمنٹ میں پیش ہی نہیں ہوا۔ رانا ثنا اللہ نے دوٹوک مؤقف اختیار کیا کہ اگر اس معاملے پر ریفرنڈم ہو بھی جاتا ہے تو آئینی طور پر معاملہ طے پارلیمنٹ ہی نے کرنا ہے، اور جب یہ معاملہ ایوان میں آئے گا تو حکومت کی جانب سے باقاعدہ پالیسی بیان دیا جائے گا اور اس پر تفصیلی پارلیمانی بحث ہوگی۔