بلبل صحرا گلوکارہ ریشماں کو مداحوں سے بچھڑے 13 برس بیت گئے

اپنی سحر انگیز اور دل کو چھو لینے والی آواز سے دنیا بھر میں منفرد پہچان بنانے والی پاکستان کی معروف ’بلبل صحرا‘ لوک گلوکارہ ریشماں کی آج تیرہویں برسی عقیدت و احترام کے ساتھ منائی جا رہی ہے۔

صحرا سے اٹھنے والی اس انوکھی آواز نے اپنی جادوئی گائیکی کے بل بوتے پر نہ صرف پاکستان بلکہ سرحدوں سے ماورا بھی لازوال شہرت حاصل کی۔ ریشماں نے اپنی منفرد لوک گائیکی کے ذریعے ریڈیو، ٹیلی ویژن اور فلمی دنیا میں دھوم مچا دی۔ ’گلِ صحرائی‘ اور ’لمبی جدائی‘ جیسے لازوال گیتوں سے امر ہونے والی یہ مایہ ناز گلوکارہ 1947ء میں بھارت کے علاقے راجستھان میں پیدا ہوئیں، اور برصغیر کی تقسیم کے بعد ان کا خاندان ہجرت کر کے پاکستان کے شہر کراچی منتقل ہو گیا۔ ایک خانہ بدوش روایتی خاندان سے تعلق رکھنے والی ریشماں نے باقاعدہ موسیقی کی کوئی تربیت حاصل نہیں کی تھی، تاہم کم عمری میں ہی انہوں نے صوفیانہ کلام گانا شروع کر دیا تھا۔ ان کی زندگی میں اس وقت ایک نیا موڑ آیا جب ریڈیو پاکستان کے پروڈیوسر سلیم گیلانی نے انہیں حضرت لعل شہباز قلندر کے مزار پر گاتے ہوئے سنا، جس کے بعد محض 12 سال کی عمر میں ریشماں کو ریڈیو پاکستان پر اپنی آواز کا جادو جگانے کا سنہری موقع مل گیا۔

1960ء کی دہائی میں جب پاکستان ٹیلی ویژن (PTV) کی بنیاد رکھی گئی تو ریشماں نے ٹی وی کے لیے بھی گیت گانا شروع کیے اور دیکھتے ہی دیکھتے پاکستانی فلموں کے لیے متعدد یادگار گیت گا کر بے پناہ مقبولیت سمیٹ لی۔ ان کی آواز کی یہ کشش سرحد پار بھی محسوس کی گئی اور ان کی یہی سحر انگیز آواز بالی ووڈ میں بھی گونجی۔ فن کے میدان میں ان کی گراں قدر خدمات کے اعتراف میں حکومتِ پاکستان نے انہیں ’ستارہ امتیاز‘ اور ’لیجنڈز آف پاکستان‘ جیسے وقار کے حامل اعزازات سے بھی نوازا۔ لوک موسیقی کا یہ درخشاں ستارہ بالآخر گلے کے موذی سرطان میں مبتلا رہنے کے بعد 3 نومبر 2013ء کو لاہور میں اس دارِ فانی سے کوچ کر گیا تھا۔