آبنائے ہرمز بحران: ترک صدر کا متبادل تجارتی راستے بنانے پر زور

ترک صدر رجب طیب اردوان نے آبنائے ہرمز میں پاک ایران اور امریکہ-ایران کشیدگی کے تناظر میں عالمی تجارت کے بلاتعطل تسلسل کو یقینی بنانے کے لیے متبادل تجارتی راستے اور راہداریاں تشکیل دینے کی اشد ضرورت پر زور دیا ہے۔

استنبول میں میڈیا سے گفتگو اور جاری بیان میں صدر اردوان کا کہنا تھا کہ آبنائے ہرمز میں حالیہ عسکری تنازع نے عالمی تجارت اور توانائی کی بین الاقوامی ترسیل کو درپیش شدید خطرات کو ایک بار پھر واضح کر دیا ہے، جس کے پیشِ نظر عالمی سطح پر مشترکہ تعاون اور متبادل تجارتی راہداریوں کی مسلسل ترقی اب ناگزیر ہو چکی ہے۔ انہوں نے کہا کہ عالمی توانائی منڈیوں اور اہم بحری تجارتی راستوں کو درپیش سیکیورٹی خطرات سے مؤثر انداز میں نمٹنے کے لیے عالمی برادری کو مشترکہ کوششیں کرنا ہوں گی، تاکہ ان تنازعات کے نتیجے میں عالمی معیشت پر پڑنے والے منفی اثرات اور مہنگائی کے دباؤ کو کم سے کم کیا جا سکے۔

ترک صدر نے اس عزم کا اعادہ کیا کہ ترکیہ ایشیا اور یورپ کے درمیان تجارتی و معاشی رابطوں کو مزید مضبوط بنانے اور متبادل زمینی و بحری تجارتی راستوں کی ترقی و ترویج کے لیے اپنی کوششیں بلا تعطل جاری رکھے ہوئے ہے۔ ان کا کہنا تھا کہ موجودہ حالات میں عالمی تجارت کے محفوظ، پائیدار اور مستحکم تسلسل کے لیے صرف ایک راستے پر انحصار کرنے کے بجائے متنوع تجارتی راستوں کا موجود ہونا وقت کی اہم ترین ضرورت بن چکا ہے۔