سفیر سید حیدر شاہ نے سیکرٹری جنرل اقوام متحدہ کو اسناد سفارت پیش کر دیں

اقوامِ متحدہ (UN) میں پاکستان کے نو تعینات کردہ مستقل مندوب سفیر سید حیدر شاہ نے اقوامِ متحدہ کے نیویارک ہیڈکوارٹرز میں سیکرٹری جنرل انتونیو گوتریس سے اہم ملاقات کی اور انہیں باضابطہ طور پر اپنی اسنادِ سفارت پیش کر دیں۔

ملاقات کے دوران سفیر سید حیدر شاہ نے وزیراعظم پاکستان اور نائب وزیراعظم و وزیرِ خارجہ کی جانب سے سیکرٹری جنرل انتونیو گوتریس کو نیک تمناؤں اور خیرسگالی کے خصوصی پیغامات پہنچائے۔ اس موقع پر گفتگو کرتے ہوئے سفیر سید حیدر شاہ نے کثیرالجہتی (Multilateralism) نظام کے لیے پاکستان کے غیر متزلزل عزم کا اعادہ کیا اور اقوامِ متحدہ کے منشور میں درج مقاصد، انسانی حقوق کی فراہمی اور بنیادی اصولوں کی مکمل پاسداری کے عزم کو دہرایا۔ انہوں نے واضح کیا کہ پاکستان عالمی امن و سلامتی، پائیدار ترقیاتی اہداف اور انسانی حقوق کے تحفظ کے لیے اقوامِ متحدہ کی تمام تر عالمی کاوشوں کے ساتھ پوری طرح سے وابستہ ہے۔

اقوامِ متحدہ کے سیکرٹری جنرل انتونیو گوتریس نے نئے پاکستانی مستقل مندوب کو خوش آمدید کہتے ہوئے اقوامِ متحدہ کے پلیٹ فارم پر پاکستان کے تاریخی اور مثبت کردار کا اعتراف کیا۔ انہوں نے بین الاقوامی امن مشنز اور سفارتی محاذ پر عالمی ادارے میں پاکستان کی فعال، تعمیری اور مثبت خدمات کو زبردست الفاظ میں سراہا