امریکی پیغامات سے ثابت ہوا حالیہ جنگ میں واشنگٹن نے ایرانی فتح تسلیم کر لی: محمد رضا عارف

ایران کے فرسٹ وائس پریذیڈنٹ (اول نائب صدر) محمد رضا عارف نے دعویٰ کیا ہے کہ امریکہ کی جانب سے مختلف بین الاقوامی ثالثوں کے ذریعے تہران کو موصول ہونے والے حالیہ پیغامات اس بات کا واضح ثبوت ہیں کہ واشنگٹن نے مشرقِ وسطیٰ کی جاری عسکری کشیدگی اور جنگ میں ایران کی اخلاقی و دفاعی فتح کو تسلیم کر لیا ہے۔

ایرانی سرکاری خبر رساں ایجنسی ’ارنا‘ (IRNA) کی رپورٹ کے مطابق، ایک تقریب کے دوران گفتگو کرتے ہوئے محمد رضا عارف نے کہا کہ ایران کے دشمن اور مخالفین گزشتہ دو بڑی عسکری جنگوں کے دوران اپنے مقرر کردہ بنیادی اہداف میں سے کوئی ایک ہدف بھی حاصل کرنے میں مکمل طور پر ناکام رہے ہیں۔

انہوں نے کہا کہ امریکہ اب بھی تہران پر دباؤ بڑھانے کے لیے مختلف حربے استعمال کر رہا ہے اور اپنے سیاسی اہداف کے ساتھ ساتھ اپنے ملک کی اندرونی رائے عامہ کے تحفظات کو بھی مدِ نظر رکھے ہوئے ہے، تاہم ثالثوں کے ذریعے موصول ہونے والے سفارتی پیغامات کا لب و لہجہ اس بات کی نشاندہی کرتا ہے کہ امریکہ بالآخر ایران کی کامیابی کو قبول کرنے پر مجبور ہو چکا ہے۔ ان کا مزید کہنا تھا کہ ایران نے حالیہ سنگین بحران کے دوران اپنے اصولی مؤقف، جغرافیائی سرحدوں اور قومی مفادات کا کامیابی کے ساتھ دفاع کیا ہے، جبکہ مخالف فریق کو اپنے کسی بھی مقصد میں کامیابی نصیب نہیں ہوئی۔