کچھ سیاسی دھڑے قانونی برادری میں افراتفری اور تقسیم پیدا کرنے کی کوشش کر رہے ہیں،پاکستان بار،سپریم کورٹ بار

اعلامیہ میں کہا گیا ہے کہ کچھ سیاسی دھڑے قانونی برادری میں افراتفری اور تقسیم پیدا کرنے کی کوشش کر رہے ہیں، جو کہ صرف اپنے سیاسی مقاصد کو آگے بڑھانے کے لیے کیا جا رہا ہے۔ مشترکہ اعلامیہ میں اس بات پر تشویش کا اظہار کیا گیا کہ یہ عناصر ملک کے جمہوری نظام کو متاثر کرنے کے لیے آئے روز بیانات دیتے رہتے ہیں۔ دونوں بار نے غیر منتخب افراد کے بیانات کی سخت الفاظ میں مذمت کرتے ہوئے کہا کہ ان کی تمام کوششیں ناکام ہوں گی۔

اعلامیہ میں مزید کہا گیا کہ دونوں بار کی سطح پر صرف قومی مسائل پر اداروں کی جانب سے بیانات جاری کیے جاتے ہیں، جبکہ انفرادی یا اقلیتی بیانات پوری قانونی برادری کی نمائندگی نہیں کرتے۔ قانونی برادری قانون کی حکمرانی اور آئینِ پاکستان کی پاسداری کے اصول پر قائم ہے۔ اعلامیہ کے مطابق پاکستان بار کونسل اور سپریم کورٹ بار ایسوسی ایشن 27ویں آئینی ترمیم کے تحت آئینی عدالت کے قیام کی حمایت کرتی ہیں، جس کے بعد صوبوں کی مساوی نمائندگی اور آئینی و سیاسی معاملات کی مؤثر سماعت ممکن ہوگی۔ اس اقدام سے عوامی مقدمات کی سپریم کورٹ میں بروقت سماعت اور فیصلے بھی یقینی بن سکیں گے۔ دونوں بار نے واضح کیا کہ وہ ججز کی تقرری سمیت تمام آئینی عمل پر نظر رکھے ہوئے ہیں اور ضرورت پڑنے پر اپنے تحفظات اور شکایات جنرل ہاؤس کے فیصلوں اور قراردادوں کے ذریعے سامنے لائیں گے۔