ٹھٹھہ میں بجلی کے تاروں سے ٹریکٹر ٹرالی ٹکرا گئی، 6 افراد جاں بحق

ٹھٹھہ: پیر جو گوٹھ کے قریب ایک دردناک حادثے میں ٹریکٹر ٹرالی اونچی وولٹیج کی برقی تاروں سے ٹکرا گئی، جس کے نتیجے میں شدید کرنٹ لگنے سے ایک خاتون سمیت 6 افراد موقع پر ہی جاں بحق اور متعدد زخمی ہو گئے۔

پولیس حکام کے مطابق حادثے کا شکار ہونے والے افراد کھیتوں سے چاول کی فصل کی کٹائی مکمل کرنے کے بعد ٹریکٹر ٹرالی پر سوار ہو کر اپنے گھروں کو واپس لوٹ رہے تھے کہ راستے میں گاڑی بجلی کے لٹکتے تاروں سے جا ٹکرائی۔ حادثے کی اطلاع ملتے ہی امدادی ٹیموں نے موقع پر پہنچ کر لاشوں اور زخمیوں کو سول ہسپتال ٹھٹھہ منتقل کیا۔

ہسپتال ذرائع کے مطابق زخمیوں کو فوری طبی امداد فراہم کی جا رہی ہے، جن میں سے بعض کی حالت تشویشناک بتائی جاتی ہے۔ پولیس نے واقعے کی تحقیقات کا آغاز کر دیا ہے تاکہ غفلت کے ذمہ داروں کا تعین کیا جا سکے۔