جوا ایپ تشہیر کیس, ڈکی بھائی کی اہلیہ کی عبوری ضمانت کنفرم

لاہور کی سیشن کورٹ نے آن لائن جوئے کی ایپلی کیشن (Gambling App) کی مبینہ تشہیر کرنے کے مقدمے میں معروف یوٹیوبر ‘ڈکی بھائی’ (سعد الرحمان) کی اہلیہ عروب جتوئی کی عبوری ضمانت مستقل (کنفرم) کرنے کا فیصلہ سنا دیا ہے۔

تفصیلات کے مطابق، لاہور کے ایڈیشنل سیشن جج نصرت صدیقی نے عروب جتوئی کی جانب سے دائر کی گئی درخواستِ ضمانت پر دونوں اطراف کے دلائل سننے کے بعد یہ محفوظ فیصلہ سنایا اور ملزمہ کی عبوری ضمانت کی توثیق کر دی۔

واضح رہے کہ نیشنل سائبر کرائم انویسٹی گیشن ایجنسی (NCCIA) نے سوشل میڈیا پلیٹ فارمز پر جوئے کی ایپ کی تشہیر اور فروغ دینے کے الزام میں یوٹیوبر ڈکی بھائی کی اہلیہ عروب جتوئی کے خلاف سائبر کرائم قوانین کے تحت مقدمہ درج کر رکھا تھا، جس میں گرفتاری سے بچنے کے لیے انہوں نے عدالت سے رجوع کیا تھا۔