بھارتی اداکارہ نے اپنے گھر سے دوست کی لاش ملنے کے بعد پہلا بیان دے دیا

بھارتی اداکارہ، ماڈل اور سابق بگ باس کناڈا کی شریکِ مقابلہ کرشی تھاپندا نے اپنے بنگلورو میں واقع گھر سے قریبی دوست اور کاروباری شخصیت ویشاک کی لاش ملنے کے چند روز بعد پہلی بار خاموشی توڑ دی ہے۔ اداکارہ نے عوام اور سوشل میڈیا صارفین سے اپیل کی ہے کہ اس افسوسناک واقعے پر بے بنیاد قیاس آرائیوں اور افواہوں سے گریز کیا جائے۔

اداکارہ نے سوشل میڈیا پلیٹ فارم انسٹاگرام پر ایک انتہائی جذباتی پیغام جاری کرتے ہوئے کہا کہ انہوں نے کبھی تصور بھی نہیں کیا تھا کہ زندگی میں ایسا دردناک وقت آئے گا جب انہیں کسی سانحے پر یوں عوامی وضاحت دینا پڑے گی۔ کرشی کے مطابق وہ ذہنی طور پر اس کیفیت میں نہیں تھیں اور نہ ہی ان میں اتنی ہمت تھی کہ اس بڑے دکھ کو الفاظ میں بیان کر سکیں۔ انہوں نے واضح کیا کہ ابتدا میں انہوں نے خاموش رہنے کا فیصلہ کیا تھا، لیکن سوشل میڈیا پر مسلسل گردش کرنے والی افواہوں اور دونوں خاندانوں پر بڑھتے ہوئے دباؤ نے انہیں حقیقت بیان کرنے پر مجبور کر دیا۔ اپنے قریبی دوست ویشاک کو یاد کرتے ہوئے کہا کہ میں نے ایک ایسے انسان کو کھو دیا ہے جو میرے دل کے بے حد قریب تھا۔ ویشاک ہمیشہ ہر مشکل وقت میں میرے ساتھ کھڑے رہے، میرا خیال رکھا اور ہر قدم پر میری حفاظت کی۔ ان کی ناگہانی جدائی نے میری زندگی میں ایسا خلا پیدا کر دیا ہے جسے کبھی پُر نہیں کیا جا سکتا۔ کریشی تھاپندا نے اس مشکل گھڑی میں ساتھ دینے والے دوستوں اور خیر خواہوں کا شکریہ ادا کیا۔ انہوں نے جذباتی انداز میں کہا کہ اس سانحے میں صرف وہی غمزدہ نہیں بلکہ ایک خاندان نے اپنا بیٹا اور کئی دوستوں نے اپنا انتہائی قریبی ساتھی کھو دیا ہے۔ اپنے بیان کے اختتام پر اداکارہ نے ہاتھ جوڑ کر اپیل کی کہ ویشاک کو سکون سے ابدی آرام کرنے دیا جائے اور ان کے اہلِ خانہ، دوستوں اور چاہنے والوں کو اس کڑے وقت میں غم منانے کے لیے رازداری (پرائیویسی) اور احترام فراہم کیا جائے۔