پیٹرول اور ڈیزل کے بعد مٹی کے تیل کی قیمت میں بھی بڑی کمی

اسلام آباد: ملک میں پیٹرول اور ڈیزل کی قیمتوں میں تاریخی کمی کے بعد وفاقی حکومت نے عوام کو ایک اور بڑا ریلیف دیتے ہوئے مٹی کے تیل کے نرخوں میں بھی نمایاں کمی کا اعلان کر دیا ہے۔ وزارتِ خزانہ کی جانب سے جاری کردہ باقاعدہ نوٹیفکیشن کے مطابق مٹی کے تیل کی فی لیٹر قیمت میں 48 روپے 29 پیسے کی بڑی کٹوتی کی گئی ہے، جس کے بعد اس کی نئی قیمت 233 روپے 90 پیسے فی لیٹر مقرر کر دی گئی ہے۔ قیمتوں میں ہونے والی یہ کمی فوری طور پر نافذ العمل ہو چکی ہے۔

اس حالیہ کمی سے قبل ملک میں مٹی کے تیل کی فی لیٹر قیمت 282 روپے 19 پیسے مقرر تھی، جس میں بڑی کمی کے بعد غریب اور متوسط طبقے کو براہِ راست مالی فائدہ پہنچے گا۔ یاد رہے کہ اس سے قبل وفاقی حکومت کی جانب سے پیٹرول کی قیمت میں 74 روپے اور ہائی سپیڈ ڈیزل کی قیمت میں 67 روپے فی لیٹر کمی کا بڑا ریلیف فراہم کیا گیا تھا، جس کے تسلسل میں اب مٹی کے تیل کے نرخ بھی کم کر دیے گئے ہیں۔