کراچی: پاکستان نے ڈیجیٹل کنیکٹیویٹی میں تاریخی سنگِ میل عبور کرلیا

کراچی: پاکستان نے ڈیجیٹل رابطوں کے میدان میں ایک بڑا قدم اٹھاتے ہوئے عالمی معیار کی سب میرین فائبر آپٹک کیبل SEA-ME-WE 6 کی پاکستان آمد کا سنگِ میل عبور کرلیا۔ کیبل کراچی کے ساحلی مقام ہاکس بے پر کامیابی کے ساتھ لنگر انداز ہوگئی۔

ٹرانس ورلڈ کے مطابق سمندر میں کیبل بچھانے کا کام ہاکس بے لینڈنگ پوائنٹ پر تیزی سے جاری ہے۔ اس جدید ترین ڈیٹا ٹرانسمیشن لائن کے ذریعے پاکستان دنیا کے متعدد ممالک کے ساتھ مزید مضبوط اور تیز ترین ڈیجیٹل کنیکٹیویٹی حاصل کرے گا۔

SEA-ME-WE 6 کی اہم خصوصیات:

کیبل کی مجموعی لمبائی 21,700 کلومیٹر ہے جو سنگاپور سے شروع ہو کر فرانس تک جاتی ہے۔

پاکستان اس اہم فائبر نیٹ ورک کے مرکزی پوائنٹس میں شامل ہے۔

یہ عالمی ہائی-کپیسٹی نیٹ ورک پاکستان کو سنگاپور اور فرانس کے درمیان واقع تمام ممالک سے جوڑے گا۔

سسٹم کی مجموعی صلاحیت 100 ٹیرا بٹس فی سیکنڈ سے زائد ہے۔

اس نئی کیبل میں زیادہ فائبر پیئرز اور پہلے سے دُوگنی سے زیادہ ڈیٹا کپیسٹی شامل ہے۔

ٹرانس ورلڈ کے مطابق SEA-ME-WE 6 کے تحت پاکستان کے لیے مجموعی طور پر 13.2 ٹیرا بٹس فی سیکنڈ کپیسٹی مختص کی گئی ہے، جبکہ ان میں سے 4 ٹیرا بِٹس فی سیکنڈ کو فوری طور پر فعال بھی کر دیا گیا ہے۔

ماہرین کا کہنا ہے کہ نئی سب میرین کیبل کی ابتدائی 4 ٹیرا بائٹس فی سیکنڈ صلاحیت پاکستان کے آئی ٹی سیکٹر، ڈیجیٹل انڈسٹری، بینکنگ، ای–کامرس اور کلاؤڈ سروسز کو انتہائی تیز ڈیٹا اسپیڈ اور مضبوط کنیکٹیویٹی فراہم کرے گی۔

اس جدید نظام سے نہ صرف پاکستان کے انٹرنیٹ بیک بون کو تقویت ملے گی بلکہ مستقبل میں بڑھتی ہوئی ڈیٹا ڈیمانڈ کو پورا کرنے میں بھی مدد ملے گی۔