جاپان میں انسان کو نہلانے والی آٹومیٹک مشین متعارف

جاپان نے نہانے کی محنت سے نجات دلانے والی جدید ’’ہیومن واشنگ مشین‘‘ متعارف کر دی ہے جو صرف 15 منٹ میں پورے جسم کو دھو کر خشک کرنے کی صلاحیت رکھتی ہے۔

سائنس ڈاٹ اِنک کی جانب سے تیار کردہ یہ خودکار اسپا کیپسول 2025 کی اوساکا ایکسپو میں پیش کیا گیا تھا اور اب اسے عوامی استعمال کے لیے دستیاب کر دیا گیا ہے۔ صارف صرف کیپسول نما پوڈ میں لیٹتا ہے، ڈھکن خودبخود بند ہوتا ہے اور مشین نرم جھاگ اور پانی کی باریک پھوار سے پورا جسم صاف کر دیتی ہے، جس کے بعد گرم ہوا کے ذریعے جسم مکمل طور پر خشک ہو جاتا ہے۔ مشین دل کی دھڑکن سمیت دیگر صحت علامات کی نگرانی بھی کرتی ہے اور ساتھ پرسکون موسیقی اور ہلکی روشنی ذہنی سکون فراہم کرتی ہے۔

کمپنی کے مطابق یہ ٹیکنالوجی معذور افراد، بزرگوں اور مصروف طرزِ زندگی رکھنے والوں کے لیے خاص طور پر مفید ہے، جب کہ ہوٹلز، ری ہیبلیٹیشن سینٹرز اور نرسنگ ہومز میں بھی اس کے استعمال کی تجویز دی گئی ہے۔ تقریباً 60 ملین ین (385 ہزار ڈالر) قیمت والی اس مشین کے 50 یونٹس تیار کیے گئے ہیں، جن میں سے پہلا یونٹ ایک ہوٹل نے خرید لیا ہے، جبکہ ریٹیلر یاماڈا ڈینکی اسے اپنے اسٹورز میں نمائش کے لیے پیش کرے گا۔