جاپان میں 118 سال پرانی جیل لگژری ہوٹل میں تبدیل کردی گئی

جیل کا نام سنتے ہی عموماً ذہن میں تنگ و تاریک کوٹھریاں، مضبوط سلاخیں اور قیدیوں کا تصور ابھرتا ہے، تاہم جاپان نے ایک صدی سے زائد پرانی تاریخی عمارت کو ایک منفرد اور پرتعیش لگژری ہوٹل میں تبدیل کر کے دنیا کو حیران کر دیا ہے۔ جاپانی کمپنی نے نارا شہر میں واقع نارا جیل کی سات برس تک مسلسل تزئین و آرائش کرنے کے بعد اسے “ہوشینو نارا پریزن ہوٹل” کے نام سے سیاحوں کے لیے کھول دیا ہے۔

نارا جیل 1908ء میں تعمیر کی گئی تھی اور رومن طرزِ تعمیر کے اس شاہکار کو 2017ء میں جاپان کے قومی ثقافتی ورثے کا درجہ دیا گیا تھا۔ تقریباً 25 ایکڑ رقبے پر پھیلی اس عمارت کا ڈیزائن ستارے کی شکل میں ہے، جس کے 5 ونگز ایک مرکزی کمانڈ پوسٹ سے جڑے ہیں۔ تزئین و آرائش کے دوران عمارت کے اصل تاریخی ڈھانچے، کمروں کے نمبروں اور لکڑی کے سبز دروازوں کو برسرِِ کار رکھتے ہوئے سابقہ حوالاتی کمروں کو ملا کر پرتعیش سوئیٹس اور ہالز میں ڈھالا گیا ہے۔ ہوٹل کا سب سے بڑا سوئیٹ 11 سابقہ کوٹھریوں کو باہم ملا کر تیار کیا گیا ہے، جہاں ایک رات کا ابتدائی کرایہ 245 ڈالر سے شروع ہوتا ہے۔ اس ہوٹل کے اندر ایک میوزیم بھی قائم کیا گیا ہے جو بین الاقوامی سیاحوں کو تاریخ اور لگژری کا ایک انوکھا امتزاج فراہم کرتا ہے۔