اسلام آباد کو ایڈمنسٹریٹو یونٹ بنانے کیلئے حدود و قیود کے تعین پر کام شروع

وفاقی دارالحکومت اسلام آباد کو نیا ایڈمنسٹریٹو یونٹ بنانے کی صورت میں اس کی حدود و قیود کا تعین آئینی، انتظامی اور جغرافیائی بنیادوں پر کیے جانے کا امکان ظاہر کیا گیا ہے۔ وزارتِ منصوبہ بندی کے ذرائع کے مطابق ابتدائی مرحلے میں موجودہ وفاقی دارالحکومت علاقے (ICT) ہی کو نئے یونٹ کی حدود قرار دیا جائے گا، جبکہ دوسرے مرحلے میں ملحقہ علاقوں کی شمولیت کے لیے باقاعدہ حد بندی اور آئینی طریقہ کار اپنانا ضروری ہوگا۔ ذرائع کا کہنا ہے کہ متعلقہ صوبائی اسمبلیوں کی منظوری اور قانونی کارروائی کے بغیر کسی بھی صوبائی علاقے کو اس نئے ایڈمنسٹریٹو یونٹ میں شامل نہیں کیا جا سکے گا۔

پلاننگ کمیشن کی تیار کردہ دستاویزات کے مطابق اسلام آباد میں بااختیار مقامی و نمائندہ حکومت قائم کرنے کے لیے اختیارات کی نچلی سطح پر منتقلی کی سفارشات مرتب کر لی گئی ہیں۔ تاہم، مسودے میں واضح کیا گیا ہے کہ امن و امان اور شہر کے ماسٹر پلاننگ سے متعلق بنیادی اختیارات نئے یونٹ کو منتقل نہیں ہوں گے بلکہ یہ امور مکمل طور پر وفاقی حکومت کے اپنے دائرہِ اختیار اور کنٹرول میں ہی برقرار رہیں گے۔