امریکا مفاہمت اختیار کرے، معاہدے کیلئے موجودہ صورتحال بہترین ہے: ایرانی صدر

ایرانی صدر مسعود پزشکیان نے تہران میں پریس کانفرنس سے خطاب کرتے ہوئے کہا ہے کہ ایران کی کامیاب سفارتکاری اور مذاکرات کی حکمتِ عملی نے امریکا کو مجبور کیا ہے کہ وہ تہران کے ساتھ مفاہمت کا راستہ اختیار کرے، اور ایک جامع معاہدے تک پہنچنے کے لیے موجودہ صورتحال سب سے بہترین وقت ہے۔ انہوں نے کہا کہ ‘اسلام آباد مفاہمتی یادداشت’ کے تحت امریکا کے لیے ضروری تھا کہ وہ ایران اور عمان کی تیار کردہ گائیڈ لائنز کی پاسداری کرے، لیکن جب امریکا نے اس کی خلاف ورزی کی تو ایران کو اپنا قانونی اور دفاعی ردعمل دینا پڑا۔ انہوں نے مزید کہا کہ معاہدے کی خلاف ورزیوں سے نمٹنے کے لیے ایک مشترکہ ٹیم کا ہونا ضروری ہے، اور ایران پورے وقار اور فخر کے ساتھ اس راستے پر پیشرفت جاری رکھے گا۔

امریکا کو شدید تنقید کا نشانہ بناتے ہوئے صدر مسعود پزشکیان نے اسے ایک استعماری اور مجرم حکومت قرار دیا اور کہا کہ امریکا سے متعلق ایران کے بنیادی رویے میں کوئی تبدیلی نہیں آئی ہے۔ امریکا اور اسرائیل اب یہ اچھی طرح سمجھ چکے ہیں کہ محض جنگ کے ذریعے ایرانی قوم کو اپنے احکامات ماننے پر مجبور نہیں کیا جا سکتا۔ انہوں نے خبردار کیا کہ دشمن اب ایرانی قوم میں داخلی تقسیم، نااتفاقی اور تنازعات کو بطور حربہ استعمال کر سکتا ہے، لہٰذا قومی اتحاد، استقامت اور پائیدار مزاحمت ہی ملک کی سیکیورٹی اور دفاعی صلاحیتوں کو محفوظ رکھنے کا واحد اور لازمی راستہ ہیں۔