ایران نے امریکی حملے کو جنگ بندی کی ’’لاپروا خلاف ورزی‘‘ قرار دیدیا

ایرانی پارلیمنٹ کی قومی سلامتی کمیٹی کے سربراہ ابراہیم عزیزی نے ایران کی ساحلی تنصیبات پر ہونے والے حالیہ امریکی فضائی حملوں کی شدید ترین الفاظ میں مذمت کرتے ہوئے انہیں دونوں ممالک کے درمیان نافذ العمل جنگ بندی کے معاہدے کی ایک ’’لاپروا اور سنگین خلاف ورزی‘‘ قرار دیا ہے۔ سماجی رابطے کی ویب سائٹ ‘ایکس’ (سابقہ ٹویٹر) پر جاری کردہ اپنے ایک سرکاری بیان میں ابراہیم عزیزی نے امریکی قیادت پر سخت تنقید کرتے ہوئے کہا کہ امریکی صدر ڈونلڈ ٹرمپ نے ان یکطرفہ حملوں کے ذریعے ایک بار پھر دنیا پر ثابت کر دیا ہے کہ وہ نہ تو سفارتی مذاکرات کے بنیادی اصولوں کے پابند ہیں اور نہ ہی ان کی انتظامیہ جنگ بندی کے کسی طے شدہ معاہدے کا احترام کرنا جانتی ہے۔

قومی سلامتی کمیٹی کے سربراہ نے اپنے تند و تیز بیان میں اس بات پر زور دیا کہ ایران کی خود مختاری پر امریکی حملہ ایک انتہائی غیر ذمہ دارانہ اور اشتعال انگیز عسکری اقدام ہے، جس کا انجام ماضی کی طرح ایک بار پھر مشرقِ وسطیٰ کے خطے میں امریکہ کے لیے شدید تزویراتی پسپائی، ہزیمت اور پشیمانی کی صورت میں ہی نکلے گا۔ امریکی سینٹ کام کی جانب سے تجارتی جہاز پر حملے کے الزامات کو یکسر مسترد کرتے ہوئے ابراہیم عزیزی نے مزید واضح کیا کہ واشنگٹن کا اپنی جارحیت کو چھپانے کے لیے ایران پر من گھڑت الزامات لگانا اور الزام تراشی کا کھیل (Blame Game) کھیلنا اب مزید نہیں چلے گا، اور ایران اپنی قومی سلامتی اور ساحلی حدود کا دفاع کرنے کی بھرپور صلاحیت رکھتا ہے۔