امریکی صدر ٹرمپ کی عالمی منڈی میں تیل کی قیمتوں میں بڑی کمی کی پیشگوئی

واشنگٹن: امریکی صدر ڈونلڈ ٹرمپ نے عندیہ دیا ہے کہ عالمی منڈی میں پیٹرول کی قیمتوں میں جلد نمایاں کمی واقع ہو سکتی ہے اور قیمتیں پہلے سے بھی کم سطح پر آ سکتی ہیں۔

وائٹ ہاؤس میں صحافیوں سے گفتگو کرتے ہوئے صدر ٹرمپ نے کہا کہ آبنائے ہرمز میں جاری کشیدگی اور شپنگ بحران کے حل کے لیے امریکا سرگرم عمل ہے اور جلد اس مسئلے کو حل کر لیا جائے گا۔

ان کے مطابق جب خطے میں صورتحال معمول پر آ جائے گی تو عالمی منڈی میں تیل کی قیمتیں واضح طور پر کم ہوں گی اور ممکن ہے کہ یہ قیمتیں اس سطح سے بھی نیچے چلی جائیں جہاں پہلے موجود تھیں۔

صدر ٹرمپ نے کہا کہ اس معاملے کے حل میں زیادہ وقت نہیں لگے گا اور متعلقہ فریقین کے ساتھ رابطے جاری ہیں تاکہ توانائی کی سپلائی کو مستحکم کیا جا سکے۔

خیال رہے کہ امریکا میں ایندھن کی قیمتوں میں اضافہ پہلے ہی سیاسی دباؤ کا باعث بنا ہوا ہے، جبکہ آئندہ وسط مدتی انتخابات سے قبل یہ مسئلہ مزید اہمیت اختیار کر چکا ہے۔