گلگت بلتستان میں انتخابی مہم کا وقت ختم، ووٹنگ 7 جون کو ہوگی

گلگت بلتستان اسمبلی کے عام انتخابات کے لیے جاری انتخابی مہم کا وقت ختم ہو گیا ہے، اور رات بارہ بجے کے بعد انتخابی سرگرمیاں جاری رکھنے پر مکمل پابندی عائد ہو گئی ہے۔

الیکشن کمیشن کے مطابق گلگت بلتستان اسمبلی کی 24 نشستوں پر مجموعی طور پر 403 امیدوار حصہ لے رہے ہیں، جبکہ ووٹنگ 7 جون کو منعقد ہوگی۔

انتخابات کے دوران سکیورٹی کے سخت انتظامات کیے گئے ہیں، جس کے تحت مقامی پولیس اور گلگت بلتستان اسکاوٹس کے اہلکار فرائض انجام دیں گے۔

اعداد و شمار کے مطابق مجموعی طور پر 9 لاکھ 58 ہزار 480 ووٹر اپنے حق رائے دہی کا استعمال کریں گے۔ ان انتخابات میں 396  مرد اور 8 خواتین امیدوار میدان میں ہیں۔

سیاسی جماعتوں کی سطح پر پیپلز پارٹی کے 23 ، مسلم لیگ (ن) کے 22 ، استحکام پاکستان پارٹی کے 15 ، مسلم لیگ کے 11 اور جمعیت علمائے اسلام (ف) کے 9 امیدوار حصہ لے رہے ہیں۔

اسی طرح مجلس وحدت مسلمین کے 7 ، جماعت اسلامی اور متحدہ قومی موومنٹ کے 6، 6  امیدوار میدان میں ہیں، جبکہ 266  آزاد امیدوار بھی انتخابی دوڑ کا حصہ ہیں۔